BMW M 1000 RS е новиот хипернејкeд мотоцикл со 218 КС

BMW ја претстави новата M 1000 RS, лимитирана хипернејкд машина која ги поместува границите на перформансите кај мотоциклите без целосен оклоп. Со технологија преземена од тркачката M 1000 RR и моќност од 218 КС, новиот модел станува еден од најмоќните сериски naked мотоцикли во светот.

Иако BMW веќе ја имаше екстремната M 1000 R со 205 КС, инженерите одлучиле дека има простор за уште повеќе перформанси. Резултатот е мотоцикл кој комбинира агресивен карактер на супербајк со порелаксирана форма на хипернејкд модел.

Мотор од M 1000 RR со 218 КС

Основата на BMW M 1000 RS е M 1000 R со M Competition Package, но најголемата промена се наоѓа под карбонскиот оклоп – моторот е преземен од суперспортскиот M 1000 RR.

Четирицилиндричниот мотор со зафатнина од 999 кубни сантиметри развива импресивни 218 КС при 14.500 вртежи во минута и 113 Nm максимален вртежен момент при 11.000 вртежи во минута. За разлика од вообичаените naked мотоцикли, каде производителите често ја намалуваат моќноста и ја подобруваат достапноста во понискиот опсег, BMW ја задржува целосната сила на тркачкиот агрегат.

Според податоците на производителот, M 1000 RS забрзува од 0 до 100 km/h за само 3,2 секунди, достигнува максимална брзина од 283 km/h, а тежината со полн резервоар изнесува околу 196 килограми.

Тркачка технологија во naked форма

BMW не се задржала само на зголемување на моќноста. Новиот модел добива низа компоненти директно инспирирани од тркачките машини.

M 1000 RS располага со карбонски тркала, целосен титаниумски издувен систем, карбонски аеродинамични крилца и задна секција преземена од M 1000 RR. Аеродинамичните елементи овозможуваат поголема стабилност при високи брзини, иако мотоциклот нема класичен целосен оклоп.

Суспензијата е електронски контролирана, додека сопирачките се дел од M Performance пакетот, развиени за справување со екстремните перформанси.

Агресивна позиција за возење

Иако naked мотоциклите традиционално се позиционираат како поудобна алтернатива на супербајковите, BMW M 1000 RS има многу поспортски карактер.

Моделот добива прилагодливи фудрепови од M 1000 RR, а седиштето е поставено 20 милиметри повисоко во споредба со M 1000 R. Со тоа се создава поагресивна позиција со поголем фокус на предното тркало и подобра контрола при спортско возење.

Ознаката RS (Rennsport) е директна референца на тркачкото наследство на BMW, а новиот модел е опремен и со M Track Package, темпомат, грејачи на рачки и 6,5-инчен TFT дисплеј.

Лимитирана серија од само 1.000 примероци

BMW ќе произведе само 1.000 примероци од M 1000 RS наменети за глобалниот пазар. Продажбата треба да започне во март 2027 година, а цената на американскиот пазар изнесува 38.395 долари.

Со комбинација од супербајк мотор, напредна електроника и тркачки компоненти, BMW M 1000 RSпретставува пример за тоа до каде може да оди сегментот на хипернејкд мотоцикли. Овој модел не е создаден поради практичноста, туку како демонстрација на инженерските можности на BMW Motorrad.