Тест Ford Focus Active: Во трендовски стил

Подемот и растот на SUV пазарот не покажуваат знаци на забавување. Но, не секој е убеден во идејата за оваа класа на автомобили. Сепак, тешко да се остане имун на идејата за автомобил што ве сместува повисоко одколку останатите во сообраќајот околу вас. Но, некој од производителите сметаат дека сепак има простор за нешто помеѓу. Mеѓу нив е и Ford со својот Focus Active.

Познати контури со нова филозофија

Новата генерација на Focus со себе носи нова филозофија на дизајнот, комбинирајќи го емоционалниот надворешен стил со водечка аеродинамика во класата. Новата силуета поседува истакната линијата на кровот, како и изразени контури. Со ова, на возилото му е подарен елегантен, но спортски карактер. Како резултат е добиен облик кој силно асоцира на сè по што е препознаватлив бестселерот. Базиран врз основата на стандардниот Ford Focus, изведбата Active поседува визуелна диференцијација која го издвојува од стандардните модели. Најпрво, тој е поставен повисоко на патот за 30 мм напред и 34 мм на задниот дел, има поцврсти надворешни елементи што се тесно поврзани со SUV возилата. Tука е и штитникот во долниот дел на предниот одбојник кој патем е со благо изменет изглед. Тука се редизајнираниот браник во задниот дел како и обложување околу лаковите на тркалата и праговите. Сето ова фино подесување му дава на Focus Active поавантуристички, груб, но софистициран изглед, наменет за трендовски животен стил.

Пространа внатрешност

Пристапот за дизајнирањето на ентериерот е во силна кохезија со надворешноста на автомобилот. Во внатрешноста се користени чисти и јасни линии кои прават лицата што се во кабината да почуствуваат дека се опкружени со висококвалитетните материјали и современ дизајн. Сите користени материјали за изработка се одлично интегрирани и комбинирани. Со тоа е овозможен визуелно простран ефект со чувство за одлична софистицираност.

Патниците на предните седишта можат да уживаат во просторот, но тоа не оди на штета на патниците на задните седишта. За нив исто така е резервиран поголем комфор кој е добиен со новата платформа и рамниот под. Дека станува збор за автомобил со повеќе простор одколку што сме навикнати во оваа класа не уверува и дизајнот на задните врати кои имаат поголем агол на отварање. Покрај тоа што кабинскиот простор профитирал од новата платформа, инжињерите не го заборавиле и делот за транспорт на багаж кој треба да одговори на потребите на едно модерно 4 члено семејство. Зафатнината на багажникот изнесува 375 литри што во целост се зема како просек во класата. Модерното живеење значи и целосна поврзаност на паметните телефони и автомобилот. Поради ова Bluetooth конекцијата доаѓа како стандарден дел за спојување со системот за комуникација и забава од последната генерација наречен SYNC 3. Управувањето се одвива преку 8-инчен колор екран осетлив на допир, кој е компатибилен со оперативните системи на Apple Car Play и Android Auto.

Потентен и ефикасен

Во тестираниот Focus Active под предниот поклопец работеше бензинскиот агрегат од обновената понуда што обезбедува оптимизирана моќност и одговара на најновите строги барања на стандардот за емисија Euro 6d. Станува збор за 1,5-литарскиот трицилиндерски турбо EcoBoost мотор на Ford. Истиот доаѓа во издание што располага со капацитет од 150 КС и се смета за еден од најдобрите агрегати на денешницата. Скептиците кои ќе ја оспорат моторната конфигурација со троцилиндарски мотор најпрво треба да го испробаат моделот со горенаведената моторизација за да се уверат дека модерната конструкција е нешто сосема спротивно од она што било познато за ваквата конфигурација во минатото. Агрегатот работи без вибрации и сосема смирено, одзивот на педалот за забрзување е моментален и делува доста убедливо во секој момент.

Податоците за економичност кои ни доаѓаат од производителот велат дека во просек за секои 100 изминати километри се потребни 5,5 литри гориво. Ние не успеавме да го постигнеме декларираниот резултат(не се ни потрудивме), но и 1,5 литри повеќе е постигнување кое вреди да се забележи. Што се однесува до перформансите, оваа потентна изведба докажува дека агрегатот достигнува посакувани вредности без никаков проблем. Забрзувањето од место на мирување до 100 км/ч трае точно 9,3 секунди, додека максималната брзина изнесува 205 км/ч. Во константна спрега со моторната единица работи и мануелната менувачка кутија со 6 брзини. Истата се одликува со одлично пресметан сооднос на пренос, работи исклучително прецизно, а менувањето на степените се одвива максимално „мазно“.

Одлична управливост

Ford Focus одсекогаш се сметал за најуправлив автомобил во класата што во новата Active изведба воопшто не e променето. Покрај режимите Eco, Normal и Sport, активната варијанта додава Slippery и Trail модови на возење. Имајте на ум, ова е се уште автомобил само со погон на предните тркала. Затоа не очекувајте од последните две поставки дека ќе ви овозможат врвни теренски способности. Тие се тука пред сè за зголемување на безбедноста во управувањето.

Вака спакуван Ford Focus Active доаѓа по цена од 23.528 евра. За возврат се добива автомобил со одлични возни карактеристики, подржани од исклучителен агрегат и менувач. Секако, и дизајн кој особено го истакнува неговиот софистициран стил.

Ford Focus Active 1.5 Ecoboost 150 

Ford Focus Active во Македонија:

Конкуренти:

Повеќе информации во Мида Гранд Моторс или на тел. (02) 3073 103.

СИТЕ ПРАВА ЗАДРЖАНИ. НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.