Редизајнираниот Maserati Quattroporte „уловен“ на шпиунски фотки

Во настојувањето да го задржи интересот на купувачите, италијанскиот производител Maserati константно ги освежува своите модели од актуелната понуда, кои од 2022 година ќе бидат заменети со целосно нови, претходно најавени модели, според плановите на FCA објавени во 2018 година.

Низ процес на рестилизација во моментов се наоѓа најголемиот и најлуксузниот модел Quattroporte, а адутот на Maserati кој ќе биде конкуренција на BMW Серија 7 и останатите слични модели, ќе им биде достапен на купувачите во втората половина на годината. Прототипот кој е „уловен“ на шпиунските фотографии на себе има блага камуфлажа кој не го сокрива голем дел од дизајнот. Освежениот Quattroporte со себе ќе донесе редизајнирани куќишта на предните и задните светла, поинакви браници, ревидирана предна решетка и новодизајнирани фелни, а помали промени се очекуваат и во патничката кабина.

Покрај евентуалните мали унапредувања на актуелните 3,0-литарски турбодизелски и турбобензински V6 мотори и 3,8-литарскиот турбобензински V8 мотор кои се задолжени за напојувањето на четиривратниот Maserati, не би требало да има некои големи новости под хаубата, бидејќи поголемите промени кога станува збор за погонската група сепак се резервирани и се очекуваат во новата генерација на Quattroporte, која неофицијално, би можела да добие и целосно електрична верзија.

Освежениот Quattroporte треба да остане во продажба околу две години. Во одреден момент во 2022 година, Maserati се очекува да го објави целосно новиот наследник, но и во случај да не пристигне во целосно електрична форма, како што е напоменато погоре, со сигурност ќе има некаков вид на електрифицирана верзија.