Bugatti Chiron Profileé е уникат кој изобилува со луксуз

Bugatti покажа извонреден претприемачки дух изминативе години. Со паметна и внимателна манипулација со својата единствена платформа и мотор, го претвори Chiron во најбрзиот автомобил на светот (Super Sport 300+), неверојатно оружје за  патеката (Pur Sport), му оддаде почит на иконскиот суперавтомобил од 1990-тите (Centodieci) и создаде еден од најпосакуваните кабриолети на светот (W16 Mistral). Но, сепак купувачите очигледно сакале нешто повеќе. А тоа, според Bugatti, е најновиот уникат на марката –  Chiron Profilée.

Profilée настана затоа што потенцијалните сопственици на Bugatti бараа од производителот на луксузни автомобили автомобил со сталоженост на патеката и брзината на Chiron Pur Sport, но со полуксузна каросерија што не го содржи фиксното задно крило на Pur Sport. На ова ниво на трошење, клиентот е секогаш во право, а Bugatti беше подготвен да испорача, се додека не се случи нешто неочекувано. Pur Sport се покажа неверојатно популарен. 60-те единици се продадоа исклучително брзо, не оставајќи простор за Bugatti да го стави Profilée во производство без да се надмине поставената граница од максимум 500 модели за целата програма на Chiron, во која се вклучени сите верзии, варијанти и подвидови.

Единствен примерок

Тоа значи дека овој Bugatti Chiron Profilée е единствениот кој постои, а компанијата ќе го стави автомобилот на аукција за добротворни цели преку RM Sotheby’s на 1 февруари.

Именуван во чест на автомобилите тип 46 и 50 на Жан Бугати, на кои им беше дадена истата етикета поради нивните карактеристични силуети, Profilée се одликува со елегантно хидраулично задно крило. Го зазема местото на фиксираниот спојлер на Pur Sport и е дизајниран и да обезбедува потисна сила и да извлекува топол воздух од просторот на моторот.

Сепак, двата автомобили го делат истото лице, секој има широки долни доводи за воздух од двете страни на големата решетка со потковица, но нема да најдете друг Chiron со елегантната сина боја Argent Atlantique како Profilée. Долниот дел од каросеријата е обработен со изложени карбонски влакна обоени во Bugatti Blu Royal, боја реплицирана во делови од тркалата, чиј дизајн е повторно ексклузивен за овој специјален Chiron. Profilée е, исто така, првиот Chiron кој доби внатрешност од ткаена кожа составена од 2.500 метри кожени ленти, кои се видливи на облогите на вратите и централниот тунел.

Изобилува со луксуз

Внатрешната завршница ѝ дава на кабината многу поинаков изглед од Pur Sport кој е обложен со Алкантара, при што и двата автомобили се карактеризираат со измени на шасијата насочени кон подобрување на агилноста на Chiron. Пружините на Profilée се за 10 проценти поцврсти наспроти Chiron Sport, а задната оска обезбедува 50 проценти повеќе негативна камбра за да го подобри зафатот во свиоци.

Максималната брзина е ограничена на 380 км/ч, што е подобро од 350 км/ч што ги нуди Pur Sport, но она што е важно е дека забрзувањето во брзина е на различно ниво од она што го добивате од обичен Chiron. Забрзувањето од нула до стотка се достигнува за 2,3 секунди

И како и Pur Sport, Profilée ги достигнува тие бројки користејќи го истиот четиритурбо W16 мотор со 1.500 КС поставен на основниот Chiron, наместо верзијата со 1.600 КС што се наоѓа во Super Sport и Centodieci.

Едно нешто што Bugatti не го открива е колку тежи Profileé. Pur Sport е 50 кг полесен од стандардниот Chiron, но голем дел од тоа се должи на фиксираните крила и карбонските тркала, но ниту една од овие одлики ги нема кај Profileé.

Што се однесува до цената, тоа ќе се дознае на 1 февруари. Но, ако се земе предвид дека Pur Sport чинеше 3,6 милиони долари и имаше 60 единици, може слободно да се претпостави дека Profileé лесно ќе ја надмине таа сума.