Euro NCAP го објави најбезбедниот автомобил за 2025

Новиот електричен CLA на Mercedes-Benz постави нови стандарди за безбедност во Европа, освојувајќи ја титулата „Best Performer“ на Euro NCAP за 2025 година. Со максимални пет ѕвездички и исклучително високи резултати во сите категории, моделот не само што е најбезбеден во сегментот на мали семејни автомобили, туку и најдобро оценет автомобил воопшто меѓу сите тестирани возила оваа година.

Врвна заштита во сите категории

Според резултатите од најновиот циклус на тестирање, електричниот CLA постигнал одлични оценки за заштита на возрасни патници, деца, ранливи учесници во сообраќајот, како и за ефикасноста на безбедносните и асистентни системи. Ова го става моделот на самиот врв на безбедносната листа на Euro NCAP за 2025 година, следејќи го примерот на Mercedes-Benz E-Class, кој ја понесе истата титула во 2024 година.

Безбедност развиена од темел

Новиот CLA е развиен целосно „од нула“, со јасен фокус на најсовремени безбедносни технологии низ целата моделска гама. Од Mercedes-Benz истакнуваат дека безбедноста е длабоко вградена во ДНК-то на брендот, а тоа се потврдува и преку независната оценка на Euro NCAP. Целта не е само заштита на патниците во возилото, туку и на сите други учесници во сообраќајот.

Напредни системи за активна и пасивна заштита

Стандардните безбедносни асистентни системи кај новиот CLA се дизајнирани да спречат голем број потенцијални несреќи. Во случај сепак да дојде до судир, каросеријата со контролирани деформациски зони, цврстата патничка кабина и напредните системи за задржување се оптимизирани за да го намалат ризикот од сериозни повреди на минимум.

140 години иновации во безбедноста

Во 2026 година, Mercedes-Benz одбележува 140 години од пронаоѓањето на автомобилот. Во текот на својата историја, брендот континуирано поставува индустриски репери, претворајќи пионерски истражувања во сериски технологии – од пасивна и активна безбедност до напредни системи за асистенција на возачот. Новиот електричен CLA е уште еден доказ за таа долгорочна посветеност, овојпат потврдена како најбезбедниот автомобил тестиран во 2025 година.