Ford ја пензионира Fiesta, пристигнува електрична Puma

Ford објави сентиментално видео со кое се збогува со еден од најпопуларните свои модели – Fiesta. Потврдувајќи ги претходните извештаи, производителот на автомобили објави дека ова е крајот на патот за популарното супермини кое ќе биде пензионирано во јуни 2023 година, шест години по дебито на сегашната генерација и помалку од две години по неодамнешниот фејслифт. Моделот индиректно ќе биде заменет со електрична варијанта на кросоверот Puma.

Fiesta е член на линијата на Ford од 1976 година и е втората најдолга ознака зад Transit на „Синиот овал“. До денес, беа претставени седум или осум генерации на Fiesta, во зависност од тоа како ќе ги пресметате бројните ажурирања во текот на неговата славна 47-годишна кариера. Овој модел се продаде во повеќе од 18 милиони примероци ширум светот и останува најпродаваниот модел во Велика Британија со близу 5 милиони продажби.

Последната Ford Fiesta ќе ја напушти производната линија во фабриката во Келн до крајот на јуни 2023 година. Книгите за нарачки ќе останат отворени додека не се распродаде преостанатиот обем на производство. Ford неодамна го исфрли хечбекот со три врати од гамата, што значи дека достапна е само Fiesta со пет врати само за последната година од неговото производство. За среќа, хот-хечот Ford Fiesta ST ќе остане уште една година како перформансен предводник на гамата. По пензионирањето на Fiesta, главната фабрика на автомобилскиот производител во Германија ќе се трансформира во Центар за електрификација на Ford во Келн, префрлајќи се на производство на електрични возила.

Прошталното видео завршува со позитивна нота, прикажувајќи тизер од електричната Puma зад вратата од гаражата со полнач. Ford Puma EV е веќе  потврден и треба да се произведува во фабриката во Крајова во Романија, почнувајќи од 2024 година.