Opel ги претстави конвенционалните Mokka варијанти
По официјално претставување на електричната Mokka-e во јуни, Opel ги претстави варијантите со мотори на внатрешно согорување
Од стилска перспектива, конвенционалната Opel Mokka речиси е невозможно да се разликува со електричната Mokka-e, со тоа што единствената позначителна модификација е додавањето на издувни цевки и недостатокот на „е“ беџови.
Новата Mokka со бензински и дизел мотори го добива истиот Vizor преден дел и Pure Panel иструменталниот кластер. Но, Opel сепак има една новина, а тоа е GS Line „тримот“, кој нуди поспортска верзија на Mokka за прв пат досега.
На надворешноста, Opel Mokka RS Line се карактеризира со црвени елементи, сјајно црн Vizor, црни тркала, двобоен покрив и црни елементи на надворешноста. Во ентериерот, Mokka GS Line добива специфичен материјал за седиштата, црвени детали на инструменталната табла, како и црна прекривка на покривот. Кога станува збор за инфозабавниот систем, купувачите ќе можат да бираат меѓу Multimedia Radio и Multimedia Navi интерфејси со 7-инчен екран на допир, а на врвот на понудата е Multimedia Navi Pro со 10-инчен екран на допир со висока резолуција.
Два бензински и еден дизел мотор
Конвенционалната Mokka ја дели истата CMP платформа со Mokka-e, а купувачите ќе можат да избираат меѓу два бензински и еден дизел мотор. На почетокот од понудата е 1,2-литарскиот турбо трицилиндричен бензински мотор со 100 КС и 205 Nm максимален вртежен момент. Овој мотор пристигнува со шестстепен мануелен менувач. По него следува помоќната варијанта на 1,2-литарскиот мотор со 130 КС и 230 Nm вртежен момент во комбинација со стандарден шестстепен мануелец или осумстепен автоматски менувач.
Единствениот дизел мотор во понудата е 1,5-литарскиот четирицилиндричен мотор со 110 КС и 250 Nm максимален вртежен момент. Тој се нуди исклучиво со шестстепен мануелен менувач и е најекономичниот од трите мотори со потрошувачка од 3,8 литри на 100 километри и емисија на CO2 од 100 g/km.
Кога станува збор за технологијата, Opel во новата Mokka нуди иновации од повисоките класи. Тоа вклучува и напредна cruise контрола и системи за активно поставување во коловозните ленти, потоа IntelliLux LED Matrix предни светла, 180-степена панорама задна камера и автоматски паркинг асистент, меѓу останатото.
