Opel го претстави радикалниот Corsa GSE Vision Gran Turismo

Opel официјално го претстави својот најнов концепт кој предизвика огромно внимание – Corsa GSE Vision Gran Turismo. Станува збор за виртуелен модел создаден специјално за легендарната видеоигра Gran Turismo 7, кој нема да се појави на патиштата, но ја претставува визијата на брендот за идните спортски електрични модели.

Електрична моќ и неверојатни перформанси

Под „каросеријата“ се наоѓаат два електромотори со по 476 КС, поставени на двете оски. Вкупната моќност изнесува 800 КС, со дополнителна функција за overboost од 80 КС достапна во четирисекундни интервали. Со ваква поставеност, Corsa GSE забрзува од 0 до 100 km/h за само 2 секунди, а максималната брзина достигнува 320 km/h.

Енергијата ја обезбедува батерија со капацитет од 82 kWh, но благодарение на лесната конструкција автомобилот тежи само 1.170 kg, што е извонредна бројка за електричен спортски автомобил.

Агресивен дизајн и футуристички ентериер

Дизајнот на концептот е целосно уникатен, понизок и поширок од серискиот Corsa модел. Се издвојуваат агресивните проширени крила, најновата верзија на Opel Vizor решетката, големото задно крило и дифузерот.

Во ентериерот доминира лесна спортска седалка со шестточковен појас, тркачки детали и футуристички осветлени панели. Интересен новитет се сензорите кои преку осветлени ткаенини на таблата и вратите го предупредуваат возачот доколку друго возило влезе во „мртвиот агол“.

Поврзување со идните GSE модели

Иако овој модел ќе остане само во виртуелниот свет, Opel нагласува дека Corsa GSE Vision Gran Turismo претставува преглед на идните спортски GSE модели. Потсетуваме, подбрендот GSE беше повторно активиран со Opel Mokka GSE, електричен SUV со 278 КС кој до 100 km/h стигнува за 5,9 секунди.

Со оваа визија, Opel испраќа јасна порака дека иднината на спортските електрични автомобили во нивната понуда ќе биде комбинација на радикален дизајн, високи перформанси и најнова технологија.