РКЕ донесе одлука за ново поевтинување на горивата
Регулаторната комисија за енергетика со својата најнова одлука ги намалува малопродажните цени на горивата во нашата земја
Од ноќеска на полноќ малопродажните цени на горивата во нашата земја повторно ќе доживеат намалување, одлучи РКЕ. Според најновата одлука на Регулаторната комисија, од вечерва на полноќ цените на нафтените деривати во нашата земја ќе доживеат намалување во просек од 1,95 проценти во однос на одлуката која беше донесена минатата недела.
Ако со изминатите две одлуки на РКЕ поевтинување имаше само кај бензините, сега со најновата одлука тука е вклучен и дизелот. Имено, според ова, цената на Еуросупер БС-95 и Еуросупер БС-98 се намалува за половина денар, додека цената на Еуродизел се намалува за еден денар.
Така, од ноќеска на полноќ, па се до следната недела, Еуросупер БС-95 ќе точиме по цена од 58 денари по литар, Еуросупер БС-98 ќе чини 60 денари, додека литар Еуродизел ќе се точи по цена од 49,50 денари.
Од РКЕ истакнуваат дека Во изминатиот седумдневен период сите референтните цени на светските берзи бележат намалување: кај бензинот за 7,942%, а кај дизелот за 6,299%.
