Тест Peugeot 308 GT: Новиот крал на класата

Во светот на SUV и Crossover возила призводителите се потешко наоѓаат причина за конструирање на некогаш најпопуларните hatchback изведби, па на општо задовоство на сите љубители марката Peugeot ја продожи низата на моделот 308, кој овој пат доаѓа со исклучително маркантен дизајн на надворешноста, врвна финална изработка и најнова технологија на која може да и подзавидат останатите компании.   

Моделот Peugeot 308 се враќа на голема врата во C-сегментот како целосно нов автомобил кој ги потенцира дизајнот и софистицираноста обележувајќи го стартот на новата ера за француската марка. Тој е воедно и првиот модел што го носи и новиот амблем на лавот, а покрај стандардните мотори со внатрешно согорување достапен од лансирањето е и со plug-in хибридни изведби, додека целосно електричниот 308 треба да се појави следната година.

Скулптурно обликуван

Впечатлив, е еден од зборовите што ви паѓаат на ум кога за прв пат ќе го погледнете целосно новиот Peugeot 308. Поелегантните пропорции играат голема улога, особено кога го гледате автомобилот од напред. Тенки предни светла со LED матрична технологија и истакнати дневни светла поставени вертикално се во кохезија со решетката на ладилникот. На неа пак е исто така нагласен е новиот амблем на брендот и значката со бројот 308 која гордо стои на долниот раб на хаубата создавајќи јасна слика на исклучителен дизајнерски пристап со длабока спортска нота. За добивањето на поелегантни пропорции тимот задолжен за новата генерација на 308 ја зголемил должинаата за речиси 110 мм, висината е намалена 20 мм, а меѓуоскиното растојание е зголемено за 55 мм.

Профилот делува доста динамично, пред сè поради долгиот поклопец на моторот, аголот на поставеност на ветробранот и ниската линија на кровот, како и контурните линии кои навлегуваат од двата краја на возилото кон вратите. Погледот кон задниот дел ни открива уште една страна на францускиот пристап кон обликувањето каде што продолжува стилот на тенки светлосни елементи со изразен светлосен потпис и високосјајна црна попречна лента која ги спојува во една целина. Во севкупниот облик се вклучува и надолната линија на покривот преточена во спојлер задолжен за подобра аеродинамика. Марката Peugeot досега имала исклучително убави модели кои ја носеле „тројката“ во името, но со новиот 308 сметаме дека се надмина себеси во дизајнерски смисол.

Премиум во секој смисол

Кабината на моделот 308 е вистински погодок. Во неа не се издвојува само современиот дизајн, туку јасно е потенциран и севкупниот квалитет на завршна обработка што е присутен низ целиот простор. Возачот седи ниско и спортски во седиште кое има одлична странична потпора, а за пронаоѓање на оптималната позиција и поставеност на малиот, ново дизајниран управувач потребно е малку време. Кабинскиот простор не е најраскошниот во класата, но секако дека 4 возрасни лица ќе се чуствуваат сосема комотно во амбиентот. Просторот за багаж располага со големина од 412 литри во основната конфигурација, а доколку имате потреба за транспорт на погабаритен товар со соборување на задните седишта добивате 1.323 литри. Забележлива улога игра инструмент таблата пред возачот која ја демонстрира посветеноста на Peugeot на најдобар начин.

Префинетоста на доработениот iCockpit во 3D технологија кој работи поефективно и поседува нови детални графички решенија дополнително го подигнува севкупниот впечатокот. Инфозабавниот екран беше една од најголемите болки на предходната генерација, но во најголем дел целосно новиот систем ја надминува таа пречка. Новиот 10 инчен дисплеј изгледа одлично и е поддржан од секундарен i-Toggles панел чувствителен на допир под него кој е со иста ширина и половина од висината, поставен под агол за полесна употреба со кратенките за сите главни функции и може да се конфигурира по желба. Времето на реакција и прецизноста се брзи и точни, додека контролите за климатизација се уште само на допир, но поголемиот дисплеј ја олеснува нивната контрола.

Новиот 308 е полн со безбедносни функции, а особено ни се допадна адаптивната контрола на темпоматот која го користи радарот скриен зад новото лого на Peugeot на предната решетка што ги чита знаците на патот. Системот е секогаш подготвен за активирање, а тоа го прикажува со големо “OK’ на iCockpit, потребно е само притискање на копчето за потврда на управувачот и системот започува со дејствување.

Адекватна целина

Тестираниот примерок го задвижуваше единствениот турбо дизелски агрегат во понудата со зафатнина од 1.5 литри и расположива моќ од 130 КС, неговата влечна сила изнесува 300 Nm и е на располагање од ниски 1.750 врт/мин. Погонот е на предната оска, а за трансмисија е задолжен 8 степен автоматски менувач кој се одликува со одлично избалансиран пренос за кој сметаме дека се поставува како идеален избор кај 308.

Бараните задачи ги извршува безпрекорно добро без разлика кој модус (sport, normal, eco) на работа го избрал возачот, соработката со исклучително флексибилниот двигател во реалност овозможува одржување на високо возно темпо и реално ниска потрошувачка на гориво. За тоа сведочи и просекот што го постигнавме по речиси 600 изминати километри кој изнесуваше 5,5 литри на секои 100 километри, со зафатнина на резервоарот од 52 литари и повнимателно возење 1.000 километри со едно полнење се со сигурност остварливи. Забрзувањето до 100 км/ч трае 10,6 секунди што е во рамките на конкуренцијата, додека стрелката на брзиномерот запира на повеќе од доволни 207 км/ч.

Иако сите погледи се упатени кон стилската надворешност, 308 поседува новина и под лимот, моделот е поставен на најновата генерација на платформата EMP2 на брендот. Веднаш е забележливо сетирањето на суспензијата кое е малку потврдо, но сепак во возењето покажа прифатливо ниво на удобност. Компромисот помеѓу комфорот и спортското управување делува многу ветувачки, постигнатата рамнотежа само покажува колку труд е вложено од страна на инжињерите на марката. Бучавата од суспензијата е добро изолирана во кабината, а силна страна на 308 во возената конфигурација е стабилноста при голема брзина.

Предходната генерација на овој модел важеше за солиден семеен хечбек, но не успеа да ја постигне посакуваната позиција на неговите творци. Затоа новата иретација на 308 ја разбира задачата далеку посеризоно и се наметнува како технолошки најнапреден, стилски префинет и висококвалитетен производ со атрибути кои се повеќе од доволно за да стане лидер во класата, Très bon, Peugeot.

Цена на тестираниот модел: 34.390 евра

погледнете ја Галеријата фотографии подолу

Технички спецификации за Peugeot 308 GT 1.5 HDi ATN 8

Peugeot 308 во Македонија

Повеќе информации во Еуроимпекс на тел. (02) 3111 000 или на www.peugeot.mk

Конкуренти

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ.