Тест Peugeot e-208: Мачка на струја

Одлуката електричните модели да не се разликуваат од остатокот на изведбите е правецот по кој одлучи да се движи Peugeot. Тивок и подготвен секогаш да реагира, со автономија која надминува 300 километри со едно полнење, е-208 се наметнува како идеален избор во класата на градски автомобили

Дизајнот кој победува не се менува

Првата прилика кога се сретнавме со Peugeot 208 истакнавме дека пред нас во моментов е најдобро дизајнираниот автомобил во класата(што го потврди и Европското Жири за Автомобил на Годината). Во случајов добрата страна е што за разлика од повеќето автопроизводители, францускиот бренд одбра различен пристап кога станува збор за дизајнот на елекрифицираните модели. Имено, наместо да создаде потполно нов производ кој нема допирна точка со гамата, Peugeot одлучи електричните модели да поседуваат идентични линии како и изведбите со бензински и дизел агрегати. Со овој потег тие сакаат да покажат дека овие изведби не треба да отскокнуваат и гласно да се истакнуваат во сообраќајот дека станува збор за автомобил кој е е погонуван од електрична енергија, напротив, тие треба да бидат сосема идентични на „мејнстрим“ изведбите.

За да се минимизираат шокот на потенцијалните купувачи разликите сè се сведуваат на сјајните обраби над отворите на тркалата, „е“ значките поставени во С столбовите, предната решетка е во бојата на каросеријата, а препознатливото лого со лав ја менува бојата во зависност од светлината што паѓа на него. Во пракса се покажа дека ретко кој на прв поглед би можел да каже дека станува збор за возило кое не користи фосилно гориво. Како и на надворешноста, Peugeot нема потреба да ги менува работите и во кабинскиот простор, впрочем тука дигитализацијата е присутна во сите моделски изведби. Просторот кој е на располагање во внатрешноста е идентичен, дури и транспортниот дел е со габарити од 311 литри што е еднаков како и кај „обичната“ 208-ца.

Peugeot e-208

Одлично изведена платформа

Моделот е-208 уште од самиот почеток е дизајниран да биде електрифициран, па така како резултат се добива целосно пакување сместено на CMP (Compact Modular Platform) која е внимателно осмислена како во себе би можела да имплементира електричен мотор и голем сет од батерии без да има потреба од дополнителни инжињерски интервенции. Пакетот со литиум јонски акумулатори се сместени во подот на автомобилот во ‘H’ распоред, 18-те ќелии се лоцирани под предните и задните седишта и нудат бруто капацитет на складирање од 50 kWh. Севкупно, во просек батериите додаваат дополнителни 300 килограми на електричната верзија во споредба со класичните изведби, но инжињерскиот тим направил напори дополнителната маса да биде лоцирана што е можно пониско и да се задржи во рамките на меѓуоскиното растојание.

Во согласност со оригиналната филозофија на дизајнирање, механичките модификации се ограничени, при што најголема промена се однесува на задна оска која е поширика за 12 мм поради сместување на задните батериски ќелии. За погонот на предните тркала кај Peugeot е-208 е задолжен синхрон електричен мотор со постојан магнет од 100 kW (136 КС), што го прави овој модел најмоќен од сите верзии на 208 засега, со многу здрав вртежен момент од 260 Nm достапен од нула вртежи. Aвтомобилот има три режими на работа: Eco, Normal, Sport, а целиот погон може да биде префрлен и во „B“ мод на работа преку кој штом се отпушти педалот за гас веднаш го менува поларитетот на моторот и започнува регенеративен ефект, a енергијата која се ослободува во овој процес ги дополнува батериските ќелии. Овој начин на работа воедно овозможува практично и возење со една педала.

Peugeot e-208

Минимални трошоци за максимално задовоство

Во градски услови на возење се истакнува стартноста која ја поседува и брзината на реакција, подвозјето е исклучително способно да се фати во коштец и со поспортските аспирации на возачите со врела крв, тоа најубаво го осетивме на локалните патишта во околината на Скопје, каде што свијоците ги нижевме како да седиме зад воланот на картинг со одлична управливост и подвозје спремно да реагира на брзите промени на правец.

Peugeot e-208

Дестинациите на отворен пат го откриваат вториот дел од приказната, е-208 го покажува комфорот што е на ниво над очекувањата, леснотијата со која се движи и стабилноста при повисоки брзини нема да ве остави рамнодушни. Кога станува збор за електричен погон секогаш се наметнува прашањето за неговот полнење. Кај е-208 тоа може да се изведе преку брз полнач со моќ од 100 kWh, (нема кај нас) што ja полни батеријата од 0 до 80% за 30 минути.

Полнењето преку 22 kWh полначи кои се присутни во нашата земја се одвива (бесплатно) во период пократок од 3 часа. Во Скопје во централните гаражи на Градски Паркинг треба да побарате картичка за електрично возило на влез, по што имате 1 час гратис полнење и паркинг, а на ЕВН треба да аплицирате за персонална картичка, по што можете гратис да користите полнење и паркинг на повеќе нивни локации на полначи низ државата(отворени-затворени паркинзи, крај ресторани и трговски центри).
За полнење пак во домашни услови со проток од 1,8 kWh се потребни „дооолги“ 29 часа, a како имате можност во домот и се приклучите на 3,2 kWh тогаш времето на полнење се сведува на 12 часа. Постојат и опции за поставување на посебни полначи во домот( WallBox) кои овозможуваат полнење со 7,4 kWh и 11 kWh, на кои им е потребно 7 односно 5 часа да ја наполнат батеријата во целост.

Секако, дека покрај времето на полнење сама по себе доаѓа и цената на потрошената електрична енергија, па ако малку се внимава и се полни преку ноќ на ефтина тарифа, целосната автономија од 340 километри ќе ја добите по цена на чинење еднаква на 3 литри 95 октански бензин! На крајот ќе додадеме дека нема движечки делови, масло и филтри за гориво кои треба да се менуваат на одредено време… со што е-208 ветува дека трошоците за одржување се сведени на минимум за време на неговата долгорочна експлоатацијата.

Цена  на тестираниот модел: 36.060 евра

Технички податоци за Peugeot е-208 Allure 50 kWh 136 HP

моторeлектричен
капацитет на батерија50 kWh
максимална моќ136 KС (100 kW)
макс. вртежен момент260 Nm
трансмисијана предни тркала преку директен менувач
потпирањенапред Мекферсонови нозе, независни попречни рамења, стабилизатор, назад торзиона оска, спирални пружини, телескопски амортизери
сопирачкинапред дискови, назад дискови, ABS, EBD, ЕЅР, ТСЅ
пневматици195/55 R16
каросеријахечбек со пет врати, пет седишта
должина х ширина х висина4.055 x 1.745 x 1.430 мм
меѓуоскино растојание2.540 мм
траги (напред/назад)1.500/1.500 мм
тежина1.430 кг
багажен капацитет311 литри
максимална брзина150 km/h
забрзување 0-100 km/h8.1 секунди
автономија340 км (WLTP)
емисија на CO20 г/км

Peugeot e-208 во Македонија

Peugeot e-208 Active Electric 50 kWh 136 HP32.520 евра
Peugeot e-208 Allure Electric 50 kWh 136 HP33.550 евра
Peugeot e- 208 GT-Line Electric 50 kWh 136 HP35.570 евра
Peugeot e-208 GT Electric 50 kWh 136 HP37.340 евра

Повеќе информации во Еуроимпекс или на тел. (02) 31 11 000

Други достапни ЕВ модели во МК:

Opel e-Corsaод 29.990 до 34.990 евра
Volkswagen e-UPод 25.000 до 28.000 евра

Клучни зборови

Поврзани вести

Back to top button
Close