Тест Toyota Yaris 1.5 Hybrid: Малечкиот кој високо цели

Појавувањето на првата генерација на Toyota Yaris се случи во сега веќе далечната 1999 година која пристигна како замена за моделот Starlet. Овој целосно нов автомобил имаше модерен, карактерен дизајн, стилски ентериер, обилна практичност и забавна природата. Иновативноста што ја поседуваше му овозможи да ја освои наградата за Автомобил на Годината за 2000 година во Европа.

Со текот на годините пристигнуваа нови изведби, втората генерација на моделот додаде зрелост, додека во третата генерација за прв пат е воведен хибридениот погон. Проблемот е, како што одеа годините дизајнот започна да бледее, секоја нова генерација постепено стануваше сè помалку иновативна на тоа поле од онаа што ја заменува. Купувачите продолжија да го бараат, но не затоа што беше возбудливо обликуван, туку поради традиционалните предности кои марката ги носи.

Во меѓувреме Toyota доби нов шеф, Акио Тојода, тој јасно кажа дека компанијата ќе го промени својот став и дека повеќе нема да произведува досадни автомобили. Неговите зборови преточени во реалност се рефлектираат целосно во новата четврта генерација на Yaris, која веднаш се бори за титулата најдопадлив автомобил во градската класа што денес е во понуда, со интересен ентериер и се разбира, хибриден погон што му носи низа предности пред конкурентите.

Скроен да привлече

За разлика од тоа што со секоја нова генерација доаѓаат нови и поголеми пропорции, Yaris во новата инкарнација на некој начин по своите димензии е најблиска до првата генерација. Габаритите на надворешноста се намалени, висината е спуштена за неколку сантиметри, додека севкупната должина е задржана под границата од 4 метри, затоа пак меѓуоскиното растојание е зголемно со што е обезбедено повеќе простор во кабината. Зашилениот, остар нос, големиот отвор за воздух, делот предвиден за поставување на регистарска табличка изведен во специфичен дезен како и внатешноста на предните светлосни групи кои го следат истиот терк се елементите кои му даваат спортска нишка на предниот дел.

Профилот, особено во двобојна верзија како што е тестираниот примерок го прави трендовски погоден. Како дополнување на предниот дел доаѓаат мускулестите ‘набабрувања’ над тркалата, опаѓачката линија на покривот и високо поставениот спојлер. Со задниот дел доминираат изразените светлосни склопови поврзани со црна пластика која изгледа како втор, пониско поставен спојлер. На крајот од долниот дел е обликот на задниот браник кој наликува на дифузор како што се употребува кај спортските модели. Заклучокот е дека со новиот пристап на креирање и малите возила на марката можат да изгледаат многу допадливо и пријатно за око, со што соодветно ќе можат да им парираат на европските конкуренти кои до неодамна важеа за дезајнерски посупериорни во тој поглед.

Јапонски прецизно

Веднаш штом стапнавме во внатрешноста на Yaris забележуваме дека при конструирањето на кабината се водело многу сметка за поврзаноста со надворешноста. Предните седишта се поставени спортски-ниско, имаат добра седечка површина и солидна странична потпора. Модерната ткаенина е користена за обвивање на вратите, меката компонента е присутна над предниот дел, остатокот од кабината е изведен во пластика која зависно од поставеноста е со вообичаена структура или е направена во висок сјај. Сè делува повеќе од солидно и се разбира, сè е беспрекорно добро составено.

Пристапот на задните седиште делува тесно, но штом ќе се влезе задната клупа има пристоен простор каде две возрасни лица ќе се сместат без никаков проблем благодарение на меѓуоскиното растојание од 2.560 мм. Патниците на располагање имаат доволно простор за стапалата и колената, а главата нема да им да допира на кровот сè додека се пониски од 190 см. Багажниот простор е во долниот дел од класата со зафатнина од 286 литри, но правилниот облик и неговата длабочина дозволува да прими повеќе одколку што изгледа на прв поглед. Напредната технологија во кабината е застапена преку инфозабавниот систем со 8-инчен екран осетлив на допир што воедно е задолжен за комуницирање со мобилните телефони кои ги користат платформите на Apple и Android и ред други модерни ситници кои се дел од стандардното опкружување во денешницата.

Многу забава, мала потрошувачка

Моделот Yaris нуди неколку моторни опции, а најинтересна од сите е токму хибридната. Што значи, хибрид автоматскиот менувач (е-CVT) е стандард и е споен со нов 1,5-литарски трицилиндерски мотор кој по традиција во Toyota работи по Аткинсон циклус и користи технологија што обезбедува далеку поголема ефикасност од обичен бензински мотор. Исто така, има нов хибриден систем од четврта генерација што користи нова и помоќна литиум-јонска батерија.

Бензинецот располага со 92 КС и максимална влечна сила од 120 Nm при 3.600-4.800 врт/мин. додека електро моторот испорачува 80 КС и 141 Nm. По комплицирана пресметка овој хибриден склоп взаемно произведува системска моќност еднаква на 116 КС. На располагање се неколку начини на работа и тоа: EV, Eco и Power. Режимот EV се обидува да го задржи автомобилот што е можно подолго користејќи само електрична енергија. Начинот Eco е насочен кон максимална штедливост, додека Power модот ја користи максималната моќ од двата система со цел постигнување што е можно подобри перформанси. Постигнувањата од 9,7 секунди до 100 км/ч и максимални 175 км/ч се движат во корист на Yaris, затоа што за време на нашето дружење бевме во средина на декларираниот просек, постигнавме просечна потрошувачка од 4,5 литри на секои 100 км, а при тоа да не бидеме нежни со педалот за забрзување.

Успешно враќање во исклучително конкурентна игра

Релативно малата тежина, ниско поставениот центар на гравитација и софистицираната архитектура прават новиот Yaris да се чувствува како автомобил со многу робустен интегритет што тешко се исфрла од зацртана линија. Во градските гужви е на негова природна територија, хибридниот систем работи беспрекорно и од возачот не бара големи залагања. Во меѓувреме, при континуирана брзина на автопатот, делува цврсто поставен и стабилен што влева дополнителна доверба кај возачот кога се патува побрзо.

За новиот Yaris Hybrid накратко може да се каже дека има успешно враќање во исклучително компетитивната игра. Исто како што тоа го стори во 1999 година, Toyota повторно има привлечна опција која поседува повеќе квалитетни атрибути потребни за директна борба со досегашните лидери во сегментот.

Цена  на тестираниот модел 19.790 евра

Технички податоци за Toyota Yaris 1.5 Hybrid Chic BiTon

Toyota Yaris Hybrid во Македонија:

Конкуренти:

Повеќе информации во Toyota Авто Центар или на тел. (02) 3088 880

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.