Abarth 595 доби свое освежување и Scorpion режим
Fiat го претстави освежениот опсег на Abarth 595 хот хечот за 2021 моделската година во Европа која вклучува четири различни варијанти
![Abarth 595](https://avtoplus.mk/wp-content/uploads/2021/01/2021-Fiat-Abarth-595-01-780x470.png)
Abarth 595 за 2021 година доби неколку освежувања за европскиот пазар, а малиот италијански хот хеч ќе биде достапен во четири различни варијанти и тоа – базичниот 595, Turismo, Competizione и Essesse. Abarth 595 ќе биде достапен во хечбек и кабрио верзија низ целиот опсег, а моќноста се извлекува од 1,4-литарскиот турбо четирицилиндерски мотор кој ќе се нуди со различна моќност, зависно од нивото на опременост. На базичниот 595 моторот ќе испорачува 145 КС, Turismo ќе има 165 КС, а Competizione и Essesse моделите ќе имаат 180 КС.
Најмоќниот агрегат кој ќе се најде на Abarth 595 Competizione и Essesse моделите е опремен со Garett GT1445 турбо, механички диференцијал со ограничено пролизгување, Koni FSD амортизери и Brembo сопирачки. Сите верзии на италијанскиот хот хеч се опремени со петстепен мануелен менувач, но Fiat исто така нуди и роботизиран секвенцијален менувач со лопатки на управувачот како опција.
Естетските промени за 2021 моделската година се ограничени на работи како преименување на Sport режимот во Scorpion, потоа унапреден ентериер за Turismo моделот кој сега вклучува Helmet Brown кожена опција, мат Rally Blue боја на екстериерот и сет на нови 17-инчни тркала од лесна легура за 595 Competizione, меѓу другото.
Купувачите исто така ќе можат да изберат нивната централна конзола да биде прекриена во Алкантара, тука се и новите кожни седишта и рачка од менувачот направена од карбон. Essesse варијантата од Abarth 595 се карактеризира со нови титаниумски издувни цевки за Akrapovič издувниот систем.
Сите модели пристигнуваат со стандарден 7-инчен Uconnect инфозабавен систем со опционални Apple CarPlay и Android Auto. Новиот BeatsAudio систем исто така е достапен.