BMW тестира i7 прототип со цврсти батерии
BMW го претстави првиот i7 прототип со solid-state батерии во партнерство со Solid Power при што новата технологија ветува поголем досег
BMW направи значителен чекор напред во електрификацијата со претставување на првиот прототип со цврсти (solid-state) батерии, базиран на луксузниот i7. Возилото користи високотехнолошки ќелии развиени во соработка со американската компанија Solid Power – партнерство кое трае од 2016 година.
Како дел од тестирањето, прототипот ќе се движи по улиците на Минхен за да се анализираат важни фактори како што се ширење на ќелиите, работни притисоци и температури. BMW соопшти дека користењето на ќелии со сулфидна електролитна основа и нивна целосна интеграција во батерискиот пакет ќе обезбедат критични податоци во наредните месеци.
Solid-state технологијата нуди бројни предности
Иако не се објавени сите технички детали, познато е дека цврстите батерии носат неколку клучни предности во однос на традиционалните литиум-јонски батерии. Тие обезбедуваат поголема енергетска густина, што може да резултира со помали батериски пакети или подолг опсег без зголемување на тежината. Дополнително, тие ветуваат побезбедно функционирање и подобри перформанси.
Сепак, BMW предупредува дека технологијата сè уште не е подготвена за комерцијална употреба. „Потребни се дополнителни развојни фази за да се имплементира ASSB (all-solid-state battery) технологијата во конкурентен систем за складирање енергија“, велат од компанијата.
Поглед кон иднината
И покрај предизвиците, BMW останува оптимист. Мартин Шустер, еден од водечките експерти за батерии во компанијата, изјави: „Нашето i7 ASSB тест возило е совршен пример за отворениот технолошки пристап на BMW. Непрекинато го унапредуваме развојот на нови технологии за батериски ќелии, заедно со вредни партнери како Solid Power.“
BMW не е единствената компанија која се насочува кон solid-state технологија. И Mercedes и Stellantis работат на слични решенија. Stellantis планира до крајот на годината да претстави флота на прототипи на Dodge Charger Daytona EV, кои ќе користат ќелии од компанијата Factorial со енергетска густина од 375 Wh/kg.
Оваа нова фаза во електричната мобилност ветува значително подобрување на автономијата, безбедноста и ефикасноста кај идните електрични возила.
