Citroen го претстави новиот e-C3

Citroen го претстави новиот e-C3, целосно електричен хечбек со стилски елементи на кросовер, чија примарна цел е да биде достапен до широките народни маси со почетна цена под 25.000 евра. Покрај електричната верзија, францускиот производител исто така потврди дека во иднина ќе има и бензински Citroen C3.

Се чини дека европскиот модел е тесно поврзан со Citroen New C3 кој дебитираше пред две години. Сепак, европскиот e-C3 може да се пофали со редизајниран лик и малку поинаков заден дел, кои се инспирирани од концептот Oli. Меѓу главните карактеристики се LED фаровите и задните светла кои го воведуваат новиот светлосен потпис на Citroen, заедно со новиот овален амблем.

Севкупно, стилот делува покоцкесто од актуелниот Citroen C3, при што e-C3 има исправен став и помускулеста каросерија. Дарежливото растојание од подлогата, пластичните заштитни облоги, шините на покривот и украсните лизгачки плочи, прават e-C3 да изгледа повеќе како B-SUV, а не како мал хечбек.

Новиот e-C3 е 19 милиметри подолг, 6 мм поширок и околу 80 мм повисок од актуелниот C3. Сепак, има помал отпечаток од C3 Aircross, кој ќе порасне уште повеќе во следната генерација која ќе пристигне догодина.

Ентериер

Актуелниот Citroen C3 беше модел кој се одликуваше со најголема удобност во својот сегмент, а новиот e-C3 ги следи истите стапки. Сите верзии и варијанти на погонски агрегати на новата генерација доаѓаат стандардно со Advanced Comfort Suspension систем со двојни прогресивни хидраулични јастуци. Оваа поставка, која е прва во сегментот на градски автомобили, ветува дека ќе понуди „возење со летечки тепих“. Друга важна карактеристика се новите Citroën Advanced Comfort седишта, со дополнителна пена што го прави патувањето на долги растојанија поудобно.

Контролната табла на e-C3 има препознатлив распоред во споредба со претходната генерација, но сè е редизајнирано. Највпечатлива карактеристика е отсуството на инструмент табла, при што најважните делови од информации се појавуваат на новиот Citroen Head Up Display.

Други карактеристики вклучуваат поголем екран на допир од 10,25 инчи за инфозабавниот систем кој е позициониран повисоко, новиот волан со рамно дно со двојни краци со интегрирани копчиња и големите прегради за складирање на контролната табла, централната конзола и панелите на вратите.

Покрај ова, Citroen тврди дека кабината кај новиот модел е значително попространа во однос на претходникот, што нуди поголема видливост и полесно влегување/излегување поради повисоката положба на седење. Багажникот има капацитет од 310 литри, што е за 10 литри повеќе од претходно.

Платформа и погонски опции

Од Citroen велат дека моделот е базиран на „Smart Car платформата“ која е развиена за електрични возила. Француската компанија не навлегува во детали, но звучи како еволуција на испробаната и тестирана архитектура eCMP/CMP, наместо новата STLA Small на Stellantis.

Електричниот автомобил доаѓа со единечен електричен мотор поставен напред кој произведува 113 КС. Овој мотор е помалку моќен од единицата со 156 КС што ја има кај Peugeot e-208 и Opel Corsa-e, но многу посилна од единицата со 57 КС кај индиската верзија на e-C3. Според Citroen, европскиот e-C3 забрзува од место до км/ч за 11 секунди и има максимална брзина од 135 километри на час.

Енергијата се добива од пакет батерии од 44 kWh литиум-железо-фосфат (LFP) што овозможува енергија за опсег од 320 километри. Оваа батерија ќе биде компатибилна со 100 kW DC полнење, што овозможува полнење од 20-80% за само 26 минути (истиот процес трае 4 часа и 10 минути од стандарден 7 kW AC полнач).

Останати верзии

Новиот Citroen e-C3 ќе се произведува во Европа, а ќе започне да се продава на европските пазари на почетокот на 2024 година со почетна цена под 25.000 евра. Оваа бројка се совпаѓа со целната цена на претстојните ривали.

Сепак тоа не е се, бидејќи Citroen објави дека ќе понуди втора ЕВ варијанта, но и бензински C3. Втората електрична верзија ќе биде ценовно уште поприфатлива со почетна цена од 19.990 евра, иако истата ќе има помал опсег од 200 километри. Што се однесува до моделот со погон на внатрешно согорување, многу е веројатно дека тој ќе биде уште поевтин од електричната варијанта.