Czinger 21C ја доби својата продукциска верзија

Компанијата Czinger, чие седиште се наоѓа во Калифорнија, го претстави својот прв модел во 2020 година. Моќниот Czinger 21C беше најавен со спектакуларни перформанси, речиси премногу добри за да бидат вистинити. Но, компанијата оттогаш вложи големи напори за да ги достигне своите цели, за конечно да ја претстави продукциската верзија на хиперавтомобилот кој ги исполнува најавените перформанси.

Czinger C21 се соочи со голем број унапредувања во однос на моделот кој беше прикажан минатата година, а тоа вклучува и поголема максимална брзина, но и други промени кои дополнително ги засилуваат перформансите. Според компанијата, моќноста се извлекува од хибридниот систем кој комбинира два електромотори со битурбо 2,88-литарски V8 мотор развиен од страна на компанијата. Вкупната моќност изнесува 1.267 КС, а моторот е во комбинација со ултра лесен седумстепен автоматизиран мануелен менувач.

Од нула до „стотка“, моќниот Czinger 21C стигнува за 1,9 секунди, што е побрзо дури и од новиот Rimac Nevera. На 21C му се потребни 13,8 секунди за да достигне брзина од 300 километри на час, додека до 400 км/ч му се потребни 21,3 секунди. Една разлика во однос на оригиналниот модел е максималната брзина која е зголемена од 423 на 452 километри на час, која може да се достигне со опционалната Vmax конфигурација.

Покрај неверојатните перформанси, една од најуникатните работи околу 21C е начинот на кој е направен. Преку компјутациско инженерство, секој дел од автомобилот е дизајниран и оптимизиран од вештачка интелигенција со цел да биде што е можно полесен, по што делот е „оживеан“ преку 3D печатење. По ова, возилото се склопува во патентираниот продукциски систем на Czinger, кој содржи автоматизиран систем на роботски раце кои работат во тандеми за да ги спојат парчињата на возилото со екстремна прецизност.