Екс-шефот на Stellantis предупредува – Групацијата може да се распадне

Поранешниот извршен директор на Stellantis, Карлос Тавареш, по неговото изненадно заминување од компанијата во декември минатата година, излезе со нова книга во која открива сериозни грижи за иднината на автомобилскиот гигант. Според написите на Bloomberg, Тавареш предупредува дека Stellantis може да биде пред ризик од распад доколку не се задржи внимателна рамнотежа меѓу клучните пазари и интереси.

Три центри на моќ што можат да ја нарушат стабилноста

„Загрижен сум дека триаголникот меѓу Италија, Франција и САД може да се наруши,“ пишува Тавареш во книгата. Според него, одржувањето на единството меѓу брендовите и регионите бара секојдневна политичка и корпоративна „борба“. Без тоа, Stellantis може да се соочи со внатрешни поделби и стратешки судири.

Тој додава дека по неговото заминување, „француските интереси можеби нема да бидат заштитени исто како порано,“ истакнувајќи дека влијанијата и приоритетите во рамките на групацијата постојано се менуваат.

Можно сценарио: Европските брендови да завршат под кинеска сопственост?

Еден од најконтроверзните делови од книгата е идејата дека во одредени услови, кинески автомобилски производител би можел да ги преземе европските марки во составот на Stellantis. Истовремено, американските брендови како Jeep, Ram и Dodge би можеле повторно да добијат поголема автономија или дури целосно да се одвојат.

Ова сценарио, како што вели Тавареш, делумно би го следело примерот на General Motors, кој пред неколку години ги продаде Opel и Vauxhall.

Наследството на Тавареш: агресивни заштеди и незадоволни работници

Периодот во кој Тавареш беше на чело на Stellantis беше обележан со силен фокус на намалување трошоци. Овој пристап доведе до подобрување на финансиската ефикасност, но отвори значителни конфликти со синдикатите во Европа и САД. Во Италија и Северна Америка, работниците јавно изразуваа незадоволство, а синдикатот UAW дури креираше и веб-страница со наслов „Sh!t Can Carlos“.

Паралелно со тоа, американските брендови на Stellantis се соочија со стагнација. Chrysler речиси исчезна од сцената, Dodge бара нов правец, а Jeep го загуби дел од своето доминација на SUV пазарот. Ram, пак, повторно се враќа кон V8 мотори за да ја врати довербата кај традиционалните купувачи.

Нова книга, нова верзија на приказната

Иако одборот на Stellantis јавно посочи дека не се сложува со дел од одлуките на Тавареш, поранешниот директор ја користи книгата за да ја објасни својата логика, визија и да укаже на ризиците кои, според него, веќе се на повидок.