Fiat 600e доби своја Abarth верзија со 280 КС
Abarth 600e е помоќен од првично најавеното, но дополнителната моќ е ексклузивна за специјалното лансирање на Scorpionissima
Abarth ги сподели деталите за новиот 600e во пресрет на лансирањето на целосно електричниот кросовер на марката во Европа. Новиот Abarth 600e e и најмоќниот модел со скорпион логото на хаубата. Достапен е во верзиите Turismo и Scorpionissima, со 240 КС и 280 КС респективно. Производството на најмоќната верзија е ограничено на 1,949 единици, како чест на основањето на брендот во 1949 година.
Abarth 600e, најавен во почетокот на 2024 година, првично беше планиран со моќност од 240 КС. Сепак, благодарение на Stellantis Motorsport, од овој модел е извлечена дополнителна моќност од 280 коњски сили за специјалната Scorpionissima верзија. Abarth 600e Turismo ја задржува почетната сила, додека двете верзии обезбедуваат 345 Nm вртежен момент и се карактеризираат со три режими на возење: Turismo, Scorpion Street, и Scorpion Track.
Во Scorpion Track режимот, Abarth 600e постигнува забрзување од 0-100 км/ч за 5,85 секунди кај Scorpionissima, и за 6,24 секунди кај Turismo, со електронски ограничена максимална брзина од 200 км/ч. Погонот се пренесува на предната оска преку механички Torsen диференцијал, кој помага да се подобри стабилноста.
Моделот е поставен на засилената Perfo eCMP платформа, развиена во соработка со Stellantis Motorsport. Специјалниот шасиен систем од Abarth вклучува Alcon кочници, поцврста суспензија, пошироки тракови и антирол бар за подобра динамика. Батеријата од 54 kWh има подобрен систем за ладење, а автономијата изнесува 334 километри според WLTP, што е малку помала споредено со верзијата на Fiat.
Дизајнот на Abarth 600e се разликува од Fiat преку спортски изглед со посебен бодикит, квадратести браници инспирирани од Abarth 850 TC, уникатни 20-инчни алуминиумски фелни и впечатлив заден спојлер. Палетата на бои вклучува посебни нијанси како Acid Green, Hypnotic Purple и други. Во ентериерот се истакнуваат Sabelt спортските седишта обложени со Alcantara, дигиталниот кластер со 7-инчен екран, како и 10,25-инчниот инфо-забавен систем со специјални Abarth графики.
Аbarth 600e веќе е достапен за нарачка на европските пазари.
