Ford со тизер ја најави премиерата на новиот Ranger
Новата генерација на Ranger ќе дебитира кон крајот на овој месец, а по тој повод Ford објави и нови тизер фотографии и видео
Ford се подготвува за премиерата на новата генерација на Ranger која ќе се одржи на 24 ноември. По тој повод, производителот објави нови тизери, а откри и дека новата итерација на пикап моделот е темелно тестирана во различни оф-роуд услови и на јавни патишта и вели дека станува збор за „најразновидниот и најспособниот Ranger досега“.
Новиот тизер е фокусиран на предните LED фарови прикажувајќи го затемнетиот Ranger како совладува воден терен. Ford исто така објави и видео од дизајнерскиот процес, вклучително и цртежи, 3D скици и модел направен од глина.
Новата генерација на Ranger е дизајнирана од страна на Ford Australia но ќе биде глобален производ и ќе се продава на повеќе од 180 пазари ширум светот. За време на развојот, дизајнерите интервјуирале повеќе од 5.000 лица и набљудувале стотици сопственици на пикап модели со цел да дознаат што им е најважно на нив кога станува збор за ваквиот тип на автомобили.
„Како дизајнери, ние соработуваме со клиентите многу порано во целиот процес, поминуваме повеќе време со нив и добиваме повеќе информации од било кога претходно. Интересно, откривме дека без разлика на пазарот, нашите клиенти се луѓе кои ја завршуваат својата работа. Тие сакаат да ги решаваат своите проблеми и чувствуваат самодоверба кога се во својот пикап камионет, не само поради функциите на возилото, туку и како се чувствуваат додека го возат“, вели Макс Трен, главниот дизајнер на Ranger.
За првпат и plug-in хибридна верзија
Новиот Ranger би требало да биде поставен на унапредена верзија на T6 архитектурата, слична на онаа која се користи кај Bronco, а ќе биде споделена и со новиот Volkswagen Amarok. Се очекува да добие 2,3-литарски EcoBoost четирицилиндричен мотор, 2,7-литарски EcoBoost V6 и веројатно 3,0-литарски EcoBoost V6 за Ranger Raptor верзијата. Исто така, за првпат ќе добие и plug-in хибридна варијанта, додека на некои пазари ќе се појави и 2,0-литарскиот EcoBlue битурбо четирицилиндричен дизел.
Во внатрешноста се очекува да се најде 15,5-инчен екран на допир од инфозабавниот систем со SYNC 4. Зад управувачот би требало да се најде 12-инчен дигитален инструмент кластер.
