Франкфурт 2019: Land Rover со долго очекуваниот Defender

Веќе неколку години бевме сведоци на кампањата на Land Rover со која го најавуваше овој модел. Се започна во 2011 година со концептот DC100, па слободно ќе кажеме дека на Land Rover му требаше долго време да го создаде овој автомобил. Ова време беше потребно за да се подготви модел кој ќе биде препознатлив насекаде во светот, но исто така и автомобил кој ќе користи за противпожарни служби, единици за спасување, брза помош …

Land Rover Defender на пазарот ќе биде понуден во неколку верзии, но две ќе бидат основни. Првата со ознака 90 ќе биде класичниот изглед со три врати со должина од 4,5 метри, додека оној поголемиот со пет врати ќе ја носи ознаката 110 и ќе има должина од 4,7 метри. Покрај овие верзии, на штандот се појавија и неколку модификации, меѓу кои и верзијата за Црвениот крст со која се прославува 65 годишната соработка.

Следната генерација на иконскиот Британски теренец претставува значително подобрување од неговиот претходник во однос на технологијата бидејќи со него ги има сите новитети на ова поле. Во презентацијата ги истакнаа нискиот кров и силните хоризонтални линии кои зрачат со самоувереност и сила. Исто така го потенцираа и практичниот ентериер со ергономија која е на завидно ниво, а тука е и традиционалното резервно тркало на задната врата.

Погонот на Defender ќе се потпира на веќе докажаните мотори на компанијата, а ќе има и plug-in верзија. Автомобилот при самиот старт ќе биде понуден со три бензински и три дизел агрегати. Овие варијанти ќе ги имаат ознаките P300, P400, P400e plug-in hybrid, D200, D240 и D300.

Кога станува збор за опремата таа ќе има пет нивоа, односно Standard, S, SE, HSE и X trim. За почеток во британија Defender ќе стартува со цена од 35.000 фунти за ознаката 90 и 45.000 фунти за – 110.