Geely го покажа новиот кросовер со Volvo технологија

Geely пред десетина години стана сопственик на шведската марка Volvo, a десетина години подоцна кинеската компанија започна да ги користи на најдобар можен начин сите знаења и технологии добиени со таа аквизација. Тоа најдобро може да се види со првите официјални фотографии од новиот кросовер кој наскоро треба да пристигне, а го носи кодното име KX11.

Компанијата не открива многу детали за својот автомобил освен дека истиот ќе пристигне наскоро. KX11 се одликува со карактеристична решетка која е обвиена со препознатливи фарови кои имаат интегрирани LED дневни светла и индикатори за насока. На кросоверот се забележливи и минималистичките заштитни пластични облоги и нагласената мускулеста линија која се движи кон задниот дел на возилото. На задниот дел се наоѓа вентилирачкиот браник со стилски хромиран трим. Кросоверот исто така има и тенки задни светла, како и спојлер кој е поставен на горниот дел од вратата на багажникот. Дизајнерите навистина се потрудиле во овој случај и очигледен е напредокот во дизајнот.

Премиерата се очекува во април

Истото се однесува и на она што не е видливо на прв поглед и со голо око и што се крие под каросеријата. Новиот Geely не открива многу детали, но од претходно е потврдено дека моделот ќе биде поставен на Compact Modular Architecture (CMA) платформата на која се поставени Polestar 2, Volvo XC40 и цел асортиман на други возила од Geely и Lynk & Co.

Автомобилот треба да влезе во производство во третиот квартал од годинава и според некои најави, ќе се нуди со турбо 2,0-литарски четирицилиндерски мотор кој ќе нуди до 238 КС и 350 Nm максимален вртежен момент. Се очекува и plug-in хибридна варијанта со 1,5-литарски трицилиндерски мотор и електромотор со вкупна моќност од 258 КС и 415 Nm. Иако се уште ништо не е официјално потврдено, сите детали за моделот би можеле да бидат објавени на Салонот во Шангај во април.