Hyundai го покажа концептот Insteroid

Hyundai повторно изненадува со својата креативност, претставувајќи го екстремниот Insteroid концепт – драстично преработена верзија на новиот градски електричен модел Inster. Овој концепт, кој комбинира елементи од гејмингот, тјунинг сцената и мотоспортот, претставува дизајнерска експлозија инспирирана од светот на видео игрите.

Insteroid: Inster на стероиди

Името Insteroid доаѓа како комбинација од „Inster“ и „steroid“, што веднаш сугерира на агресивниот изглед и нагласениот спортски карактер. Огромните проширени крила, длабокиот преден браник со интегриран сплитер и колосалниот заден спојлер го прават Insteroid неодоливо налик на тркачки болид од 1980-тите. Дури и задните врати се елиминирани поради радикалната ширина на каросеријата, а целите тркала изгледаат како да излегуваат надвор од стандардните димензии.

Аеродинамика инспирирана од Group B и Pikes Peak

Аеродинамичките решенија, како назабените отвори над предните тркала – слични на оние кај Porsche 911 GT3 RS – и масивниот заден спојлер, потсетуваат на легендарните Group B автомобили, како MG Metro 6R4 и Suzuki Escudo од Pikes Peak. Insteroid не е само визуелен спектакл, туку и дизајнерски експеримент кој ги поместува границите на урбаните EV модели.

Внатрешност: Гејмерска естетика и тркачки дух

Кабината на Insteroid е подеднакво радикална. Опремена е со рол-кафез, тркачки седишта и отстранети теписи – карактеристики типични за мотоспорт возила. Но, тука се и влијанијата од поп културата: вградениот Beat House звучен систем и графиките инспирирани од класични видео игри како Space Invaders додаваат уникатен гејмерски шмек.

Мистерија под хаубата

Иако Hyundai сè уште не открива што се крие под каросеријата на Insteroid, очекувањата се високи. Со оглед на екстремниот дизајн, малку е веројатно дека концептот користи само 95 коњски сили како стандардниот Inster. Можеби се работи за истиот 650-коњски двомоторен погон од Ioniq 5 N – систем кој веќе се користеше во RN24 концептот, инспирација за Insteroid.

Визија, не производство (засега)

„Овој проект ни овозможи целосна креативна слобода, црпејќи инспирација од видео игрите за да создадеме емотивна и возбудлива визија за брендот Hyundai,“ изјави Едуардо Рамирез, главен дизајнер во Hyundai Design Europe.

Иако не се очекува Insteroid наскоро да стигне во производство, концептот би можел да влијае врз идни спортски варијанти на Inster. А со оглед на тоа што Renault веќе најави ограничено производство на својот електричен 5 Turbo 3E, можеби и Hyundai ќе се реши за нешто слично.