Hyundai го претстави новиот Ioniq 6 N
Hyundai Ioniq 6 е електричен спортски седан со 641 КС, забрзување до „стотка“ 3,2 секунди и напредна N технологија за врвно возачко искуство

Hyundai официјално го претстави својот втор високоперформансен електричен модел од „N“ дивизијата – Ioniq 6 N, кој премиерно ќе настапи на овогодинешниот Goodwood Festival of Speed. Овој електричен седан со спортски амбиции достигнува од 0 до 100 km/h за само 3,2 секунди, и е директен конкурент на Tesla Model 3 Performance.
Агресивен дизајн и уникатен карактер
Ioniq 6 N е базиран на освежената верзија на серискиот модел, но со значителни визуелни измени. Предниот браник е целосно редизајниран со големи отвори за воздух и нагласен сплитер. Нови странични прагови, редизајниран заден дел со масивен браник и по прв пат – заден спојлер во swan-neck стил. Додадени се и проширени крила, како и ексклузивната боја Performance Blue Pearl.
Моќност што ќе ве залепи за седиштето
Под каросеријата се крие идентична погонска поставка како кај Ioniq 5 N – 84 kWh батерија и два електромотори со комбинирана моќност од 601 КС (448 kW), која се зголемува на 641 КС (478 kW) со активирање на N Grin Boost. Забрзувањето до 100 km/h трае 3,2 секунди, а максималната брзина изнесува 257 km/h. Благодарение на 800-волтната архитектура, батеријата се полни од 10 до 80% за само 18 минути со DC полнач од 350 kW.
Технологија за вистински возачи
Ioniq 6 N доаѓа со бројни системи за подобрување на возачкото искуство: N Active Sound+ со три прилагодливи звучни профили, N e-Shift за симулација на 8-степен автоматски менувач, како и N Drift Optimizer, N Battery Preconditioning и N Torque Distribution со 11 нивоа за распределба на вртежниот момент. Новитет е N Ambient Shift Light – амбиентално осветлување што сигнализира оптимални моменти за менување брзини.
Подготвен и за пат и за патека
Подвозјето е преработено со нова геометрија, а стандард се специјално развиени Pirelli P Zero 5 гуми (275/35 R20). Внатрешноста добива спортски третман со нови педали, спортски N седишта, N управувач и дури GoPro држач на кровот – идеален за снимање наспроти времето на патеката.
Засега без цена, наскоро во продажба
Цената и автономијата сè уште не се објавени, но се очекуваат наскоро. Hyundai Ioniq 6 N претставува комплетен пакет за оние кои сакаат перформанси, технологија и дизајн – сето тоа во електрична форма.