Lexus подготви специјална Hokkaido верзија на LC за Европа

Новата ограничена серија на Lexus LC за Европа, која го носи името Hokkaido Edition, се одликува со специјални дизајнерски елементи и е наречена по островот Хокаидо – луксузна дестинација за патување во Јапонија која е позната по своите вулкани, планински шумски предели, Онсен бањите и прекрасните патишта.

Хокаидо островот исто така е дом и на Lexus Shibetsu погонот каде спортските модели како LFA и LC се развиени. Новиот Lexus LC Hokkaido е достапен во купе и кабрио верзија. Визуелно може да се разликува благодарение на 21-инчните тркала од лесна легура, црниот финиш на решетката и хромираните елементи, како и сет на нови задни светла. Моделот е ексклузивно достапен во Flare Red, Sonic Platinum, F White и Graphite бои додека LC во кабрио изведба е достапен со црн или црвен мек покрив.

Во внатрешноста е применет двобоен третман со темно црвени и црни нијанси. Покрај црвениот тапациран централен тунел и централна конзола, вратите и контролната табла од страната на возачот е финиширан во црвена боја, додека остатокот од ентериерот е црн за прекрасен асиметричен ефект. Изборот на боите е инспириран од вулканската природа на Хокаидо регионот, а присутна е и нумерирана плочка која потсетува на тоа дека моделот е дел од ограничена серија.

Купувачите ќе можат да го добијат Lexus LC Hokkaido со хибриден V6 или V8 мотор, исто како и „обичниот“ LC. LC 500h е опремен со 3,5-литарски V6 и два електромотори кои испорачуваат вкупно 359 КС и 500 Nm максимален вртежен момент. Помоќниот LC 500 е опремен со природно аспириран 5,0-литарски V8 агрегат кој испорачува 477 КС и 540 Nm.

Производството на LC Hokkaido е ограничено на 40 купе и 40 кабрио модели за 2022 за Европа, а продажбата започнува во април оваа година.