Лука де Мео си заминува, Renault Group ќе добие нов шеф

По пет успешни години на чело на Renault Group, италијанскиот менаџер Лука де Мео официјално ќе се повлече од функцијата извршен директор на 15 јули 2025 година. Според официјалното соопштение, одлуката е донесена од лични причини, со желба да се посвети на нови предизвици надвор од автомобилскиот сектор.

Архитектот на „Renaulution“ заминува со завршена мисија

Лука де Мео беше креаторот на Renaulution стратегијата, објавена во 2021 година – трансформациски план кој ја вклучи електрификацијата на моделската понуда, лансирањето на нови електрични и хибридни модели, реинкарнацијата на Renault 5, како и целосната ориентација на Alpine кон EV сегментот. Истовремено, ја зацврсти позицијата на Dacia како буџетски бренд со стабилен раст.

Бордот со благодарност, а наследникот ќе биде објавен наскоро

Бордот на директори на Renault изрази благодарност за лидерството на де Мео и соопшти дека е започнат процесот за избор на нов извршен директор, врз основа на однапред утврден план за наследување. Името на новиот извршен директор ќе биде објавено дополнително.

Новата дестинација: луксузната групација Kering

Францускиот весник Le Figaro пренесува дека 58-годишниот де Мео ќе премине во луксузната групација Kering, сопственик на брендови како што се Gucci, Yves Saint Laurent, Balenciaga и Alexander McQueen. Групацијата се соочува со голем пад од 77% во вредноста на акциите од 2021 година, што значи дека новиот лидер ќе мора да развие стратегија за обнова.

„Го завршивме невозможното“

Во својата изјава, Лука де Мео рече:

„Доаѓа момент во животот кога знаеш дека работата е завршена. За помалку од пет години, се соочивме со огромни предизвици и постигнавме она што многумина мислеа дека е невозможно. Денес, резултатите зборуваат сами за себе – тие се најдобри во историјата на компанијата.“

Тој додаде:

„Имаме силен тим, агилна организација и стратегија за следната генерација производи. Време е да ја предадам штафетата. Одам со увереност дека оставам трансформирана компанија, подготвена за иднината.“

Богато искуство во авто-индустријата

Пред да се приклучи на Renault, де Мео имаше водечки улоги во неколку големи автомобилски компании, вклучувајќи ги Seat и Cupra во рамки на Volkswagen Group, како и претходни ангажмани во Fiat, Abarth и Alfa Romeo во времето на FCA.