Нови правила за увоз на автомобили и заштеда до 1,3 милиони евра
Со новиот правилник постапките се поедноставуваат, трошоците се намалуваат, а импортерите ќе издаваат потврди за технички барања
Од вчера стапи во сила нов Правилник со кој се воведуваат европски стандарди во постапките за одобрување на типот на возилото, единечното одобрување, идентификацијата и оцената на техничката состојба, како и издавањето потврди за исполнетост на техничките барања. Со ова, по цели 17 години од донесувањето на Законот за возила, конечно почнува неговата целосна примена според европските правила.
Министерството за енергетика, рударство и минерални суровини информира дека измените беа презентирани пред повеќе од 40 овластени застапници и импортери на возила, кои ќе бидат директно вклучени во новите постапки.
Клучни промени и постапки
Со новиот правилник, одобрувањето на типот на возилото ќе важи за сите варијанти и изведби според WVTA документот, освен ако импортерот не побара поинаку. Единечно одобрување ќе се врши само за возила без одобрен тип во државата или во Европската унија, а сите останати ќе одат директно во постапка за идентификација и техничка оценка.
Импортерите отсега имаат обврска да издаваат потврди за исполнетост на техничките барања за возила со европско или национално одобрение на тип. За возилата без одобрение, потврдите ќе се издаваат од независни институции признати од Бирото за метрологија.
Финансиски и административни придобивки
Според првични проценки, со новите правила ќе се заштедат околу 1,3 милиони евра годишно кои досега завршуваа кај странски компании за TÜV потврди што не требало да се бараат. Сега процесот ќе се регулира преку овластените застапници – домашни компании, што ќе значи и задржување на парите во земјата.
Роковите за одобрување во Бирото за метрологија ќе се скратат на половина, што ќе овозможи побрза и поефикасна процедура. Исто така, цените на услугите ќе бидат регулирани, додека потврдите за исполнетост на техничките карактеристики кај застапниците ќе чинат меѓу 40 и 50 евра.
