Освежените Ibiza и Arona се подготвуваат за својата премиера

Во пресрет на премиерата која треба да се одржи на 15 април, Seat ги објави првите тизери од освежените Ibiza и Arona. Двата модели ќе добијат нов преден дел со кој ќе се приближат до поновите автомобили на шпанскиот бренд како што е Leon, а исто така ветуваат дека ќе претстават „револуција во ентериерот“.

Ова веројатно значи дека Ibiza и Arona ќе добијат нов инфозабавен систем со поголем екран на допир, заедно со нов дизајн на контролната табла. Исто така се очекува и воведување на дигитален инструмент кластер. Од фотографиите кои ги сподели Seat може да се забележи третманот кој го добива Arona на предниот дел, а тука е новиот браник со „теренски“ изглед, како и кружните магленки поставени под фаровите. Малиот SUV ќе се одликува со поробусен дизајн на екстериерот понагласен „оф-роуд“ карактер.

Покрај ова, Ibiza и Arona исто така ќе ги добијат и своите имиња на задниот дел од автомобилот, поставени на централниот дел веднаш под логото. Овој „ракописен фонт“ досега беше искористен од страна на Seat кај новиот Leon и кај Ateca моделите, па оттаму е и логично што шпанскиот бренд се одлучи за ист чекор и овојпат.

„Seat Ibiza е еден од темелите на успехот на брендот, со речиси шест милиони возила продадени низ пет генерации, додека Arona е столбот во опсегот, со оглед на тоа дека беше вториот најпродаван модел на Seat минатата година. Унапредувањата и фејслифтот на двата модели им носи на возилата неверојатни атрибути, како и покомплетна понуда при освежувањето на дизајнот“, изјави Вејн Грифитс, првиот човек на Seat и Cupra.