Porsche Taycan пристигна во Македонија

Ние имавме шанса да ја „уловиме“ оваа електрична ѕверка преку нашиот објектив која е изложена во продажниот салон на Porsche, во рамките на комплексот на Порше Македонија. Моделот кој е изложен е Porsche Taycan Turbo, a ние навистина уживавме во неговата убавина.

Од Porsche Македонија останаа таинствени кога станува збор за цената, но и за тоа дали веќе има некој среќен купувач во нашата држава кој ќе го понесе овој електричен убавец со себе дома и ќе ужива низ улиците на нашите градови.

Инаку, Porsche Taycan Turbo поседува фрапантни 680 КС кои се добиваат преку два електромотори, а автономијата со едно полнење изнесува 450 километри. Најголемата брзина е ограничена на 260 километри на час, а од нула до „стотка“ стигнува за 3,2 секунди.

Porsche Taycan со својот пуристички дизајн го најавува почетокот на новата ера, а во исто време ја задржува препознатливата ДНК на Porsche. Силуетата се обликува со спортска покривна линија која оди во надолна линија кон задниот дел, а карактеристични се и извајаните странични делови.

Внатрешноста исто така импресионира. Со заоблениот кластер на инструменти се става јасен фокус на возачот, а централно поставениот 10,9-инчен инфозабавен систем и дополнителниот патнички дисплеј се комбинирани за да формираат интегриран стаклен опсег во долгиот преден панел.