Се поголемите SUV димензии прават проблем во европските градови

Брзорастечката популарност на SUV возилата не покажува знаци на опаѓање, а побарувачката за истите постојано расте. Но, овие големи автомобили не се задоволуваат само со доминација на пазарот, туку исто така се повеќе растат во своите димензии. Во Северна Америка и Кина се веќе навикнати на сето тоа, но во Европа ситуацијата е мошне поинаква.

Во густо населените европски градови, каде што улиците се потесни, а паркирањето знае да биде вистинска главоболка, растот на димензиите кај SUV моделите предизвикува огромни проблеми. Една неодамнешна студија откри еден интересен факт – во просек, новите патнички возила во Европа се зголемуваат во ширина за 1 сантиметар на секои две години, навлегувајќи во просторот што може да го користат другите учесници во сообраќајот.

Експертите предупредуваат дека без регулаторна интервенција од Европската унија, овој тренд може да продолжи, што ќе доведе до сè поголем метеж и опасни услови за пешаците и велосипедистите како учесници во сообраќајот.

Во моментов, максималната дозволена ширина за сите возила во Европската унија е 255 сантиметри. Овој закон беше донесен во средината на 90-тите за да се ограничи големината на автобусите и камионите. Денес, тој делува како дупка за производителите на автомобили да произведуваат теренци и пикапи кои се преголеми за европските патишта и не се вклопуваат во стандардниот јавен паркинг простор.

Според новата студија на Transport & Environment (T&E), просечната ширина на новите автомобили во ЕУ сега надмина 180 цм, со просечен годишен раст од 0,5 цм од 2001 година. Џејмс Никс, авторот на извештајот за T&E, за Guardian изјави: „Тоа можеби не звучи како огромна бројка. Но, реалноста е дека – освен ако нема реформи – група на големи луксузни теренци и пикапи ќе станат широки како камиони и автобуси“.

Проблем е и паркирањето на улица

Тесните улици се вообичаена глетка во Европа, а паркирањето на улица не ги олеснува работите. Во многу случаи, местата за паркирање се дизајнирани за возила со ширина до 180 сантиметри, што значи дека приближно половина од новите автомобили на пазарот денес нема удобно да се вклопат во овие места.

Студијата од T&E вклучува графикон кој го илустрира влијанието на големите теренци на типична улица во споредба со „просечниот“ автомобил. Слични графики од други извори го покажуваат ефектот на поголемите возила на улиците асфалтирани во претходниот век.

Извештајот сугерира дека законодавците треба да ја преиспитаат максималната големина на патнички возила и лесни комерцијални возила за да го заштитат јавниот простор од „натамошно навлегување“. Големината на возилото – а особено висината – е исто така клучна за безбедноста на патиштата. Според студијата спроведена од Институтот Vias во Белгија помеѓу 2017 и 2021 година, подигнувањето на хаубата на возилото за 10 цм го зголемува ризикот од смртни случаи при судир со пешаци и велосипедисти за неверојатни 30%.

Европскиот парламент и Советот треба да го решат ова прашање на почетокот на 2024 година. Франција веќе спроведе програма за обесхрабрување на употребата на потешки возила, а градовите Париз и Лион размислуваат да наметнат повисоки такси за паркирање за поголеми и потешки возила во наредните месеци.