Специјален Abarth 695 70 Anniversario во Скопје

Abarth во 2019 година, во чест на 70-годишнината на брендот, претстави специјално и роденденско издание на својот 695 модел. Ограничен во само 1.949 примероци, во чест на годината на настанувањето на брендот, Abarth 695 70 Anniversario е виситнска „џебна ракета“ и пристигнува со цел асортиман на козметички додатоци.

Ваквиот роденденски примерок, кој е еден од само 1949 примероци во светот, сега пристигна и во продажниот салон на Fiat во Скопје, а редакцијата на Авто Плус доби можност од прва рака да се запознае со специјалната верзија.

Овој примерок на Abarth 695 својата моќност ја добива од препознатливиот 1,4-литарски турбо мотор со 180 КС и 250 Nm максимален вртежен момент, што е доволно да го лансира автомобилот од место до „стотка“ за 6,7 секунди, пред да достигне максимална брзина од 225 километри на час. Моделот е поставен на 17-инчни SuperSport тркала, а зад нив е Brembo сопирачкиот систем со 305, односно 240-милиметарски дискови и шапи финиширани во црвена боја.

Специјален финиш на екстериерот

Monza 1958 бојата на екстериерот е потсетник на првиот 500 Abarth кој успеа да собере вкупно шест меѓународни рекорди таа година, а овој ретро финиш е комбиниран со Campovolo сиви акценти со што се добива еден актрактивен двобоен изглед. Особен впечаток остава и специјалниот заден спојлер кој мануелно се подесува во 12 различни позиции. Овој спојлер е развиван во аеро тунел со цел од него да се извлече максимална ефикасност. Аголот на спојлерот може да се подесува од 0 до 60 степени, а зависно од позицијата, истиот може да додаде до 42 килограми потисна сила при брзини од 200 км/ч. Промените на надворешноста завршуваат со новоразвиоениот Record Monza издувен систем со активни вентили за подобар звук.

Промени има и во кабината, каде добива Sabelt седишта кои се ексклузивни за оваа роденденска едиција, како и индивидуално нумерираната плакета која потсетува дека ова не е обичен Abarth 695. Тука е и управувачот обложен во Алкантара, заедно со уште неколку спортски детали. Моделот пристигнува со поддршка за Apple CarPlay и Android Auto, DAB дигитално радио и навигациски систем за 7-инчниот екран на допир. Како дел од стандардната опрема тука е и автоматскиот клима-уред, дневните светла, LED магленки, уникатни патосници и Abarth телеметрискиот систем.

Повеќе детали за роденденскиот Abarth 659 70 Anniversario се достапни на официјалниот веб сајт, или пак посетете го продажниот салон на Fiat во Скопје.