Тест Citroen C4: Современа еволуција на францускиот идентитет

Моделот C4 е автомобил кој нуди многу повеќе од колку што ќе забележите на првиот „состанок“. Со освежен дизајн, рафинирана внатрешност и напредна технологија, тој е подготвен да ги задоволи барањата на индивидуалците кои се во потрага по свежа доза на француски стил и комфор.

Кога Citroen го претстави новиот C4 пред 5 години, беше јасно дека марката избра да тргне по сопствен пат. Наместо класичен хечбек или SUV, Французите создадоа нешто што ги комбинира двете категории, т.н. „крос-хеч“ со подигнат став, изразена силуета и дизајн кој веднаш го издвојува автомобилот од конкуренцијата. За 2025 година, C4 добива освежување кое му носи повеќе зрелост, поубави пропорции и технолошки подобрувања, но го задржува оној специфичен шарм што го прави вистински претставник на марката.

Изразена силуета

Моделот C4 отсекогаш се издвојувал со својот необичен изглед, а редизајнираната верзија дополнително го нагласува тоа. На прв поглед, предниот дел изгледа понапредно во однос на претходникот. Новото лого, поставено во средината на решетката е визуелно нагласено со тенките ЛЕД светлосни тела кои се протегаат кон надворешноста, создавајќи впечаток на широчина. Дневните светла имаат специфичен светлосен потпис во форма на стрелки, што му дава уникатна препознатливост. Браникот е редизајниран со почисти линии и поизразени странични отвори, а декоративниот „штитник“ на долниот дел додава визуелен елемент на робусност. Сето тоа прави автомобилот да изгледа пософистицирано.

Од страна, автомобилот го задржува својот карактеристичен облик. Линијата на покривот е ниска и растегната наназад во форма на купе, но благодарение на покачениот клиренс и заштитните пластични панели, профилот има СУВ карактер, што е дополнет со новите 18 инчни тркала со аеродинамични капаци кои се особено впечатливи. Задниот дел делува максимално складно во целината, следејќи го новиот правец на обликување. Новите LED светла со затемнети детали изгледаат современо и се добро интегрирани во динамичната форма на багажникот. Спојлерот на горниот дел додава спортски карактер, додека централно поставениот натпис „Citroën“ ја нагласува идентитетската припадност.

Француски комфор и практичност

Со влегувањето во кабината веднаш се чувствува француската филозофија за комфор. Просторот е уреден, топол и опуштен, а користените материјали се со подобар квалитет во споредба со претходната иретација. Седиштата изведени по системот „Advanced Comfort“ се едни од најудобните во класата. Меката, но поддржувачка пена овозможува релаксирани патувања и за возачот и за патниците. Арматурната табла е изведена минималистички, но со многу внимание на деталите. Во центарот доминира 10-инчниот инфо-забавен систем, кој е поддржан со побрз софтвер и поинтуитивно мени, а безжичната поддршка за Android Auto и Apple CarPlay е стандардна.

Зад воланот се наоѓа 5,5 инчен дигитален инструмент панел кој, иако е нешто помал од конкуренцијата, нуди доволно информации и може да се персонализира. Што се однесува до внатрешните габарити, C4 нуди солиден простор. На предните седишта има многу место за глава и колена, а задната клупа е повеќе од доволно широка за две возрасни лица да патуваат удобно. Багажникот со капацитет од 380 литри е конкурентен во класата, а со преклопување на задните седишта може да се добие и повеќе од доволен товарен простор. Еден од големите адути на C4 е неговиот технолошки пакет. Citroen вгради широк спектар на системи за помош на возачот, со што овој модел се доближува до нивоата на повисоките класи.

Верен на својата филозофија

Нашиот тест автомобил беше опремен со добро познатиот 1.2-литарски трицилиндричен турбо бензинец PureTech, кој развива 130 КС. Овој мотор е еден од најчесто користените агрегати во групацијата Stellantis, а во C4 доаѓа во комбинација со автоматскиот менувач со осум степени (EAT8). На пат, моторот се однесува тивко и мазно, со доволно сила за секојдневни потреби. Забрзувањето од 0 до 100 км/ч трае нешто повеќе од 10 секунди, што е сосема солидно за оваа класа. Автоматскиот менувач работи флуидно, без забележителни „размислувања“, при изборот на степените на преносот.

Во градски услови, моторот е агилен и овозможува лесно движење низ сообраќајните гужви, додека на автопатот обезбедува стабилно возење со доволно резерва за претекнување. Една од клучните предности на овој мотор е неговата економичност. Во просек, потрошувачката се движи околу  6.8 литри на 100 километри, зависно од стилот на возење и условите на патот. Во град знае да порасне до 7.7 литри, додека на автопат, со умерено возење, се симнува на 6 литри. Она што секогаш го издвојувало Citroen е удобноста на возење, и C4 тука не прави исклучок. Благодарение на системот „Advanced Comfort“, амортизерите ги апсорбираат нерамнини со леснотија. Дури и кога ќе се помине преку подлабоки дупки или „лежечки полицајци“, автомобилот останува стабилен и комфорен. Управувањето е лесно и прецизно, што е идеално за градски услови, но истовремено обезбедува доволно сигурност при повисоки брзини

Моделот C4 не е најспортскиот модел во класата, ниту најрационалниот по однос на просторот што го обезбедува, но нуди комбинација на комфор и уникатен изглед што го прави мошне привлечен. За оние кои сакаат автомобил што излегува од стандардните клишеа и носи доза француска оригиналност, освежениот C4 е автомобил што заслужува внимание.

Цена на тестираниот модел: 24.990 евра

Технички карактеристики за Citroen C4 Plus Turbo 130 Automatic

Citroen C4 во Македонија

Повеќе информации во Citroen Македонија или на тел. (02) 30 93 011

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.