Тест Volkswagen Amarok: На повисоко ниво

Моделот Amarok премиерно беше лансиран во 2010 година, како првенец од својот вид за марката од Волсфсбург. Денес, речиси 13 години подоцна пред нас е долгоочекуваниот, нов Volkswagen Amarok. Поголем, посмел, попрефинет, подобро поврзан и далеку поспособен „германски“ пикап од било кога до сега.

На самиот почеток мора да појасниме, целосно новиот Amarok е создаден со помош на друга почитувана автомобилска марка. Во оваа прилика како дел од пошироката соработка помеѓу Volkswagen и Ford во областа на комерцијалните возила каде компаниите имаат интензивна размена во двата правци. Ваквите соработки не се ништо ново во автомобилската индустрија, за тоа сведочат многу примери, а тука ќе го спомнеме само пикапот Mercedes X-Class кој беше базиран на добро познатиот модел Nissan Navara. На крајот на денот бенефитот е обостран, а на купувачот му се нуди уште една дополнителна алтернатива при изборот.

Сериозна појава

Како што е ред, секоја компанија што држи до себе вметнува некои делови и финеси кои ќе го дистанцираат од останатите и ќе го поврзат одредениот модел со карактеристиките на возило кое доаѓа од куќата, во случајов на Volkswagen. При првата средба со Amarok здивот го одзема маркантната појава и „гигантските“ пропорции. Неговата должина изнесува огромни 5.350 мм, широк е 1.910 мм, а висината е далеку над просекот на жител во нашата земја и изнесува 1.884 мм. Ако на сето тоа ги додадете и меѓоскиното растојание од 3.270 мм и одалеченоста од асфалтот 235 мм станува јасно дека пред вас е сериозен примерок.

Како што може да се види од приложеното, новиот Amarok има доста уникатен изглед. На прв поглед, може да се забележат идентични елементи со својот брат близнак, како што се надворешните ретровизори, рачките на вратите и линија на покривот, но тука завршува секоја поврзаност. Браниците се сосема различни, како и пластичните обраби над тркалата, светлосните склопови го следат IQ патернот на компанијата, плус тука е и маската на VW која е голема и импозантна, а на задниот дел помеѓу двата светлосни групи со облик на бумеранг, на задната врата гордо стои втиснато името на моделот.

Пикап не е само работно возило

И покрај заедничката основа со Ford Ranger, одговорните во Volkswagen се погрижија да вментнат доволно елементи по кои ќе се разликува дизајнот на ентериерот кај моделот Amarok. Ако ги барате, има голем број на детали кои ги поврзуваат овие два модели, како што се клучот, необичните рачки на вратите и менувачот, но она што е важно е изгледот на контролната табла, која е сосема поинаква кај Amarok, изведена со посуптилен пристап.

Кај повисокиот дел од гамата, вклучувајќи го и тестираниот модел (Style) има 12,3-инчен екран наменет за за инструментите пред возачот и 12-инчен екран на допир поставен во портрет ориентација што се грижи за инфозабавниот систем и дел од функциите на климатизацијата. Физичките прекинувачи се присутно во мал број, но сепак ги има, поставени се под екранот и зад рачката на менувачот со што е овозможен брз пристап до одредени функции. Системот овозможува поврзување со Apple CarPlay и Android Auto, а не е заборавена ни подлогата за безжично полнење, како и двата типа на USB порти.

Се забележува дека управувачот е производ на VW, а големо задоволство е што на него се поставени физички копчиња, а не „хептички“ команди како што се користат во поновите генерации на патнички автомобили. Самиот кабински простор делува доста богато за ваков тип на возило, просторот во кабината ги надминува очекувањата. Првенството е дадено на предните седишта каде комфорот е исклучителен, но не се заборавени ниту патниците на задната клупа од која нема се пожалат и покрупни лица.

Севкупниот впечаток на внатрешноста е одличен во визуелна смисла, сликата не бледее ни и од перспектива на квалитетот на употребените материјали, додека пакетот на опременост во тестираниот примерок оди до таму што е на еднакво ниво како кај развиканите SUV модели. Кој вели дека пикап треба да е само работно возило? Кога веќе зборуваме за пикап неизбежно е да се спомене и неговиот товарен простор. Овој тип на возила во светот е познат и под името „еден тон пикап“, а Amarok во целост го оправдува истото. Со себе може да понесе една евро палета или тежина која не ја преминува границата од 1.100 килограми, алките кои се поставени во товарниот простор дозволуваат прицврстување на терет до максимални 400 килограми. Доколку пак имате потреба да транспортирате нешто што е далеку потешко или погабаритно, и тоа не е проблем, бидејќи капацитетот за влечење на приколка изнесува 3.500 килограми.

Шест цилиндри се вистинската мерка

Компанијата Volkswagen со Amarok јасно порачува дека неговиот талент не егзистира само на асфалтна подлога. За комфорот и стабилноста се грижи зголеменото меѓуоскиното растојание за 175 мм, што исто така се грижи за подобра способност кога е надвор од патот. Аголот на пристап е 30 степени, додека максималниот агол со кој одстапува е 26 степени. Овие параметри, во комбинација со автоматскиот менувач и погонот на четири тркала, што овозможува заклучување на диференцијалот на задната оска, го ставаат Amarok во добра позиција кога треба да се управува во предизвикувачки услови на терен.

Со големо растојание од подлогата и 3,0-литарски V6 турбодизел агрегат што располага со моќност 240 КС и уште поважните 600 Нм влечна сила, Amarok добро се справуваше со сложените предизвици по патеки на кои се движевме. Десетстепениот автоматски меувач својата работа ја извршува на висина на задачата, секогаш го одржува моторот на потребните вртежи како не би изгубил ни тронка од перформансите, што резултира со одлични возни карактеристики на и вон асфалтната подлога. Доколку сакате, можете да ги изберете брзините рачно, а тоа се изведува преку копчињата поставени од страната на менувачот. Сепак, оваа функција не делува толку интуитивно за користење и бара привикнување.

Во „регуларни“ услови, трилитарскиот V6 му дава на Amarok способност да се движи многу лесно и при типично секојдневно возење, дигиталниот бројач на вртежи вели дека речиси цело време сме помеѓу 2.000 и 2.500 вртежи во минута. Промените на брзините обично поминуваат незабележливо се додека возите разумно, доколку ви треба ненадејно да забрзате, менувачот инстантно ќе спушти неколку брзини подолу како би го задоволил моменталното барање. Додека се движите низ многуте режими на возење, секоја од нив покажува детална анимација на дисплејот пред возачот која е дизајнирана да им помогне на оние кои можеби не се толку искусни или сигурни кој режим да го изберат во дадена ситуација. Откако ќе се избере саканиот мод на возење, возилото автоматски ја активира применливата поставка за менувачот и погонот, што значи дека процесот може да започне.

За сите кои ги интересираат перформансите ќе кажеме дека забрзувањето на речиси 2.3 тешкиот пикап од место на мирување до 100 километри на час трае само 8,8 секунди, додека максималната брзина со која може да се движи изнесува 180 км/ч. За време на нашето дружење во просек трошевме по 12,0 литри дизел гориво на секои 100 изминати километри, што е над декларираниот просек, но во рамките на очекуваното.

Новата генерација на Volkswagen Amarok е сестрано возило кое може да покрие многу повеќе од секојдневните потреби на едно просечно семејство или мал бизнис.  Доволно цивилизиран за асфалтни потреби и максимално подготвен за теренски авантури. Останува само прашањето, дали ви е потребно вакво возило? Доколку одговорот е позитивен, тогаш слободно препуштете се во целост на еден од најнапредните пикап возила во моментов на пазарот.

Технички податоци за Volkswagen Amarok V6 Style 

Цена на тестираниот модел: 52.600 евра

Volkswagen Amarok  во Македонија

Повеќе информации во Порше Македонија на тел. (2) 26 26 266 или на www.vw-komercijalnivozila.com.mk

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.