Toyota ќе произведува ЕВ во Чешка, целта е 100.000 единици годишно

Toyota подготвува значаен чекор кон зголемување на своето електрично присуство во Европа. Според извештај на Nikkei Asia, компанијата планира да ја претвори својата фабрика во Чешка во центар за производство на електрични возила, со целосен капацитет од 100.000 единици годишно од 2028 година.

Локализација на производството и усогласување со ЕУ регулативите

Одлуката за локално производство е дел од стратегијата на Toyota за усогласување со европските регулативи, вклучувајќи ја забраната за продажба на нови возила со мотори со внатрешно согорување по 2035 година. Компанијата веќе најави дека до 2026 година ќе понуди 14 целосно електрични модели во Европа, меѓу кои и електричните верзии на C-HR+, Urban Cruiser, како и освежениот bZ кросовер.

Европа пред домашниот пазар

Европскиот пазар е далеку понапреден во прифаќањето на електричните возила во споредба со Јапонија. Додека во Европа EV моделите сочинуваат околу 15,4% од новите регистрации, во Јапонија тој удел е само 2%. Локалното производство во Чешка ќе и овозможи на Toyota да биде поконкурентна и да одговори на растечката побарувачка за електрични автомобили во регионот.

Притисок од кинеските производители

Како и многу традиционални производители, Toyota се соочува со зголемен притисок од кинеските марки како BYD, Jaecoo и Xpeng, кои заедно веќе имаат 5,1% удел на европскиот пазар. Новата фабрика и зголеменото производство би можеле да помогнат во задржување на пазарниот удел пред конкуренцијата.

Внимателен пристап кон електричната иднина

И покрај најавите за нови EV модели, Toyota останува внимателна во својата електрична стратегија. Компанијата и понатаму ќе вложува и во хибридни технологии и системи со продолжен опсег, особено за поголеми возила, поради предизвиците со тежината на батериите и автономијата.