Toyota вели дека форсирањето на ЕВ е штетно за планетата
Toyota има податоци кои докажуваат дека политиката за целосен фокус исклучиво на електрични возила е штетна за околината
И покрај тоа што направи повеќе од некој друг производител на автомобили за да ја популаризира идејата за хибридна технологија, Toyota бавно влегува на пазарот на целосни електрични возила и како резултат на тоа доби сериозни критики.
Но, сега Toyota тврди дека има податоци за да докаже дека целосната транзиција кон ЕВ, како што се обврзаа многу ривалски производители на автомобили, не е само лоша деловна одлука, туку може да биде лоша за животната средина. Главниот научник на компанијата, Гил Прат, вели дека е многу пологично автомобилските компании да нудат автомобили со различни извори на енергија, вклучувајќи хибриди и водород.
Електричните возила не произведуваат штетни емисии, но проблемот е во нешто друго. Прат вели дека се сведува на достапноста на литиум, минералот што се користи во производството на батерии. Тој предвидува дека автомобилската индустрија наскоро ќе биде погодена од недостиг на литиум, како и други минерали што се користат во производството на батерии, а исто така и недостаток на точки за полнење бидејќи бројот на ЕВ во производството вртоглаво расте.
И ако нема доволно литиум на располагање за напојување на десетици милиони ЕВ, има смисла да се сподели меѓу хибридните возила. Прат вели дека производството на милиони хибриди ќе има поголемо влијание врз излезот на CO2 отколку користењето на иста количина на литиум за да се создаде помал број чисти ЕВ.
Toyota и понатаму ќе вложува во електрични возила
Во хипотетички модел наведен во Automotive News, Прат започнува со 100 возила со согорување кои испуштаат 250 g/km CO2. Ако имате доволно литиум за производство на батерии од 100 kWh, можете да изградите една Tesla со долг дострел со врвни спецификации, но преостанатите 99 возила сепак би биле на согорување, што дава бројка на CO2 на флотата од 248,5 g/km. Сепак, ако се распределат тие 100 kWh помеѓу 90 традиционални хибриди, оставајќи само 10 автомобили со обично согорување, просечната емисија паѓа на 205 g/km.
Ова не значи дека Toyota не е заинтересирана за ЕВ. Неодамна го најави седанот bZ3X за Кина за да го надополни својот теренец bZ4X. Но, компанијата е категорична дека ривалските фирми прават грешка со тоа што ја фрлаат целата своја тежина зад чистите електрични возила.
„Ќе дојде криза“, изјави Прат за Automotive News. „Времето е на наша страна. Овие недостатоци – не само на материјали за батерии, туку и на инфраструктура за полнење – ќе направат многу јасно дека една големина не одговара на сите и дека најдобриот одговор е всушност мешавина од различни типови возила.
