„Златно тркало 2022“, по 3. пат објавена широката листа

Сега веќе традиционално, во своето трето издание, наградата „Златно тркало“ се враќа на сцената, а Националниот избор за најпосакуван автомобил започнува со своите активности. За таа цел, организаторите ја објавија листата на новитети на македонскиот пазар од кои официјалните импортери ќе можат да ги пријават своите адути во трка за наградите.

По успешните претходни изданија во време на пандемија, „Златно тркало“ продолжува да поставува трендови, па така трета година по ред ќе се избираат најпосакуваните автомобили во различни категории, како и добитникот на Главната награда според гласовите на македонската јавност.

Во конкуренција влегуваат возила кои пристигнаа или ќе пристигнат на македонскиот пазар непосредно пред почетокот на гласањето. Авто Плус, заедно со останатите организатори, оформи листа, а останува на импортерите да ги издвојат своите модели со кои ќе учествуваат. По ова, ќе се формираат различни категории, а секој кој има пристап до глобалната интернет мрежа ќе може да го даде својот глас за својот фаворит.

По пријавата на кандидатите ќе биде објавена и конечната листа на учесници кои ќе конкурираат во Националниот избор за автомобил на годината. Сите автомобили-кандидати ќе бидат тестирани од страна на организаторите, а импресиите и впечатоците ќе бидат споделени со јавноста. Гласањето ќе се одвива на централниот сајт www.zlatnotrkalo.mk, додека доделувањето на наградите ќе се одржи во текот на годината на специјален гала настан.