Викенд тарифа: Mercedes-AMG GT 63 S со нов рекорд на Нирбургринг
Во август Porsche објави дека освежената Panamera Turbo е најбрзиот автомобил во Е сегментот, но Mercedes со AMG GT 63 S си ја врати титулата
Mercedes-AMG GT 63 S 4Matic+ е најбрзиот автомобил од луксузната класа на Нирбургринг. Според Mercedes, рекордот на Porsche Panamera Turbo е срушен благодарение на инженерот за развој Демиан Шаферт кој ги постигна официјалните времиња од 7:23.009 и 7:27.800 минути. Двете времиња се побрзи од оние на Panamera Turbo, што значи дека GT 63 S 4Matic+ си ја врати круната во оваа класа по само три месеци.
Од Mercedes велат дека автомобилот бил комплетно стандарден, но добро опремен за задачата со оглед на тоа дека има 4,0-литарски V8 мотор кој испорачува 639 КС и 900 Nm максимален вртежен момент. Поддржан од деветстепениот менувач и систем за погон на сите тркала, автомобилот може да забрза од нула до „стотка“ за 3,2 секунди пред да достигне максимална брзина од 315 километри на час.
