Lancia со тизер најави нов концепт како насока за брендот во следните 10 години
Сè уште неименуваниот концепт на Lancia ќе дебитира на 15 април, најверојатно како еволуција на дизајнерската студија Pu+Ra
Lancia моментално во својата понуда има само еден модел кој е достапен само на матичниот пазар во Италија. Сепак, ова наскоро ќе се промени, бидејќи компанијата најави дека планира да лансира барем три нови модели до 2028 година. Следните години изгледаат возбудливо за легендарната марка, а првите најави за нејзината ветувачка иднина ќе видиме веќе следниот месец.
Lancia го најави новиот концептен модел – едноставно познат како Lancia Concept – пред неговото официјално и целосно деби на 15 април оваа година. Единствената достапна слика досега го покажува задниот дел на она што многу личи на модерна интерпретација на Stratos.
Она што сигурно е познато во овој момент е дека она што го прикажа Lancia е тесно поврзано со дизајнот на Pu+Ra Zero, претставен во ноември минатата година.
„Со задоволство ве поканувам на прес-настанот на Emozione Pu+Rа на 15-ти април за да го откриете концептот Lancia, манифестот на брендот за следните 10 години. Зачувајте го датумот и останете во тек! Следува повеќе“, изјави Лука Наполитано, извршниот директор на Lancia.
Манифест за следните 10 години
Според овие зборови, изгледа дека Lancia ќе го најави својот иден дизајнерски јазик наместо конкретен претстоен производствен модел.
Италијанската компанија веќе официјализираше дека новата генерација на Ypsilon доаѓа во 2024 година. Актуелниот модел е во продажба од 2011 година и е еден од најдолговечните модели што се уште се продаваат во автомобилската индустрија. И покрај неколкуте фејслифтови и технолошки надградби, тој сè уште е градски автомобил што ја споделува својата платформа со Fiat 500 и Panda, развиени во 2003 година. Новиот Ypsilon ќе биде проследен со нов водечки модел во 2026 година и електричен наследник на Delta две години подоцна.
Lancia има и ново лого, кое за прв пат ќе се види на новиот Ypsilon следната година. Како дел од својот амбициозен план за воскреснување, Stellantis сака брендот да продава само електрични возила до 2028 година и да отвори 100 нови салони во Европа. Програма за искуство за купување преку Интернет исто така е во развој.
