Maserati со ново видео ја продолжи тизер кампањата за MC20

Maserati претходно годинава потврди дека нивниот нов спортски модел ќе ја понесе ознаката MC20, што претставува скратеница за Maserati Corse 2020 и е потсетник на тркачкото педигре на компанијата. MC20 требаше својата премиера да ја доживее во мај, но поради корона кризата, истата е одложена за септември. Италијанскиот бренд водеше долга тизер кампања за својот нов модел во последните неколку месеци, а со последното видео ни дава можност да видиме како ќе изгледа автомобилот без никаква камуфлажа.

Иако не станува збор за тизер кој открива многу, сепак е доволно за да се забележи заоблената каросерија и вентилирачката прекривка за моторот на задниот дел. Иако не е „хардкор“ како неговиот претходник MC12, новиот MC20 се смета за духовен наследник и вистински Maserati кој ќе добие свој мотор, наместо да се потпира на агрегат на Ferrari како што беше случајот со MC12.

Италијанците се уште не ги откриваат сите детали и наведуваат дека Maserati MC20 ќе биде суперспортски автомобил кој е природна еволуција на мошне успешниот MC12 кој во текот на својата кариера забележа 22 победи и 14 шампионски титули. Автомобилот воедно ќе претставува и почеток на една нова ера за италијанската марка, а ќе добие и своја електрична варијанта, која ќе располага со три електромотори, погон на сите четири тркала, батерии од 800V, голема автономија и брзо време на полнење.

Maserati MC20 ќе се напојува со новиот битурбо 3,0-литарски V6 Nettuno мотор со 630 КС и 730 Nm максимален вртежен момент. Ова е првиот мотор кој е целосно изработен од Maserati по 20 години и е развиен со електрификација, со оглед на тоа дека MC20 ќе добие и хибридна верзија.

Премиерата на новиот MC20 ќе се случи на 9 септември, а првите испораки на автомобилот се очекуваат во 2021 година. Една година подоцна ќе пристигне и кабрио верзијата.